Урысыем спортымкIэ и Министерствэ зэхищэгъэ зэнэкъокъоу спортым нахь зыщыпылъ унагъохэр къыхэгъэщыгъэнхэм фэгъэхьыгъэм иятIонэрэ чэзыу изэфэхьысыжьхэр къэнэфагъэх.

Зэнэкъокъум «Самая спортивная семья России» зэреджагъэхэр. Ащ хэлэжьагъэх Приморскэ краим, Москва, Санкт-Петербург, Ленинград ыкIи Кировскэ хэкухэм, Пермь, Барнаул ащыпсэухэрэр. Мы илъэсми анахь къахэщыгъ Приволжскэ федеральнэ шъо­лъырыр – ащ къикIэу лъэIу тхылъи 100 спортымкIэ Министерствэм къыIукIагъ. Министрэу Михаил Дегтяревым къыIуагъ:
«Проектыр 2024-рэ илъэсым щыIэныгъэм щыпхырытщэу едгъэжьагъэми, унагъоу спортым зыщыпылъхэм япчъагъэ хэхъонымкIэ, ахэм IэпыIэгъу афэхъугъэнымкIэ амалышIоу зыкъыгъэлъэгъуагъ. Унэгъуабэ спортым пылъ къодыехэп, ащ фэдэ щыIэныгъэм цIыфхэр нахьыбэу фащэнхэм пылъых. ТэркIэ ащ мэхьанэшхо иI. ТекIоныгъэ къыдэзыхыгъэхэм яфэшъошэ шIухьафтынхэр Москва щаратыжьыщтых, ахэр агъэшIощтых.
Зэнэкъокъум хэлэжьагъэхэм зэкIэми, ны-тыхэми, ныжъ-тыжъхэми, кIэлэцIыкIухэми лъэшэу тафэраз, джащ фэдэу тренерхэу, шъолъыр командэхэу унэгъо спортым зиушъом­бгъуным зиIахьышIу хэлъхэм».

Лъэныкъоу «Анахь чанэу зэнэкъокъухэм ахэлэжьагъэхэр» зыфиIорэм «дышъэр» щафагъэшъошагъ Кировскэ хэкум ит псэупIэу Головизнинцы къикIыгъэ Фадеевхэм яунагъо. Мыхэм лыжэхэмкIэ ыкIи чъэнымкIэ зэнэкъо­къухэм шIухьафтыныбэ къащахьыгъ. Зэ­шъхьэгъусэхэм ыкIи ахэм ялъфыгъищ ренэу зэгъусэхэу якъулайныгъэ къагъэлъагъо.
ЯтIонэрэ лъэныкъоу «Семейное селфи на спорте» зыфаIуагъэм текIоныгъэ къыщыдахыгъ Приволжскэ федеральнэ шъолъырым къикIыгъэ Яковлевхэм. Евгениерэ Денисрэ шъэожъыитIу зэдапIу. Лъэныкъоу »Спортивная традиция» зыфаIуагъэм щатекIуагъ Ленинград хэкум и Всеволжскэ район ит къалэу Бугры щыпсэурэ Чистяковхэм яунагъо. Илъэс 83-рэ зыныбжь ныжъым къыщегъэжьагъэу илъэси 4 хъугъэ Илья нэсыжьэу мыхэр спортым пылъых.
Череповец щыщ Портновхэр щатекIуа­гъэх «Семейные чемпионы» зыфаIогъэ лъэны­къом. Даниилрэ Натальерэ пшъэшъэжъыитIу зэдапIу, нэбгырэ пэпчъ спорт лъэпкъ зэфэшъхьафхэмкIэ гъэхъагъэхэр яIэх. Пшъэшъэ­жъые нахьыжъыр атлетикэ псынкIэм пылъ, нахьыкIэм бальнэ къашъохэр къыхихыгъ. Мы унагъор «IофшIэным ыкIи зыкъэухъумэжьыным сафэхьазыр» зыфиIорэм и Урысые фестиваль Вологодскэ хэкур къыщигъэлъэгъощт.

ГТО-м испорт унагъоу къыхахыгъ Приморскэ хэкумкIэ къалэу Находкэ щыпсэурэ Воронинхэм яунагъо. Мыщ илIэужищым спортыр ящыIэныгъэ пытэу хэт хъугъэ.
Барнаул щыщ Никитенкэхэм лъэныкъоу «Семейная сборная» зыфиIорэм къыщыхагъэщыгъэх. Унагъом ышъхьэу Николай ишъхьэгъуси, икIэлэцIыкIуиплIи лыжэхэм атыригъэуцуагъ.
Лъэныкъоу «Спортивная династия» зыфиIорэм текIоныгъэ къыщыдихыгъ Москва щыпсэурэ Фроловхэм яунагъо. ЗэлъашIэрэ боксерэу ыкIи тренерэу Лев Фроловыр унагъом ищысэтехыпI, илъэс 40 хъугъэу боксымкIэ тренер, ыкъоу Алексей ятэ ­игъогу тет, апшъэрэ категорие зиIэ тренер, илъэсий зыныбжь Ване джыдэдэм нэмыкI спорт лъэпкъхэм апылъми, боксым зэрэпыхьащтыр къеIо.
Iофтхьабзэм зэфэхьысыжь къыфишIызэ министрэм къыхигъэщыгъ: «ТекIоныгъэ къы­дэзыхыгъэхэм ахэтых гъэхъэгъэшIухэр зэряIэхэм имызакъоу, ежь ищысэкIэ цIыфхэр нахьыбэу спортым фэзыщэхэрэр».