АР-м и Правительствэ зычIэт унэм щыкIогъэ Iофтхьабзэр зыфэгъэхьыгъагъэр Урысыем и ЛIыхъужъэу Олег Цоковым иуна­гъо – ишъхьэгъусэу Елена Цоковамрэ янэу Алла Цоковамрэ Александр Невскэм иорден ятыжьыгъэныр ары. ­Адыгеим и ЛIышъхьэу ­КъумпIыл Муратрэ Къыблэ дзэ коим хэхьэрэ дзэхэм пIэлъэ гъэ­нэфагъэкIэ пэщэныгъэ адызезыхьэрэ Владимир Кочетковымрэ а орденыр ЛIыхъужъым игупсэхэм аратыжьыгъ.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м идзэ комиссарэу Александр Авериныр, федеральнэ программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, Къыблэ дзэ коим иаппарат иIофышIэхэр.

ЛIыхъужъым иунагъо зыкъыфигъазэзэ Владимир Кочетковым къызэриIуагъэмкIэ, мы зэIукIэгъур тичIыпIэгъоу Олег Цоковым ишIэжь зэрэдгъэлъапIэрэм ишыхьат, ащ лIыхъужъныгъэу зэрихьагъэр, пытагъэу къыхэфагъэр, и Хэгъэгу зэрэфэшъыпкъагъэр тыгу къэдгъэ­кIыжьынымкIэ джыри зы амал дэгъоу ар щыт.

«Непэ тыкъызкIызэрэугъоигъэр УФ-м итарихъ дышъэ хьарыфхэмкIэ зыцIэ хэхьэгъэ, тихэгъэгу, мамырныгъэм зыпсэ афэзыгъэтIылъыгъэ цIыфым ишIэжь дгъэлъэпIэным пай. Олег Юрий ыкъор лIыхъужъ ­шъыпкъэу, чIыпIэ къиным IэпыIэгъу щафэхъуным фэхьазырэу, хэгъэ­гум ыкъо шIагъоу, патриот шъыпкъэу ар щытыгъ», — къы­Iуагъ Владимир Кочетковым.

Адыгеим и ЛIышъхьэу Къум­пIыл Мурат къызэгущыIэм къы­зэрэхигъэщыгъэмкIэ, Хэгъэгум илIыхъужъхэм яшIэжь хэмыкIокIэным пае республикэм ихэбзэ къулыкъухэм афэшIэщтыр зэкIэ ашIэ.
«Олег Юрий ыкъом фэгъэ­хьыгъэ къэбархэр еджапIэхэм ачIэсхэм къафаIуатэх, тиныбжьыкIэхэм ар щысэ афэхъу, агу нахь къеIэты. Къалэу Мыекъуа­пэ изы урамхэм ащыщ Олег Цоковым ыцIэ фаусыгъ, джащ фэдэу Урысыем и ЛIыхъужъхэм ацIэкIэ къалэм иурамищмэ яджа­гъэх. ТичIыпIэгъу лIыхъужъхэр зэрэтщымыгъупшэщтхэм пае тшIэшъун тлъэкIыщтым изы Iахь цIыкIу ныIэп ар», — къыIуагъ АР-м и ЛIышъхьэ.
ЛIыхъужъым ишъхьэгъусэрэ янэрэ къызэгущыIэхэм респуб­ликэм ипащэхэм, Къыблэ дзэ коим иIэшъхьэтетхэм Олег Цоковым ишIэжь зэрагъэлъапIэрэм пае зэрафэразэхэр къаIуагъ, хэгъэгум иухъумэкIо лIэужыкIэхэм ар щысэ зэрафэхъущтым яцыхьэ ­зэрэтелъыр къыхагъэщыгъ.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.