ЩытхъуцIэ къыфагъэшъошагъ
Урысыем и Президентэу Владимир Путиным и УказкIэ я 227-рэ артиллерийскэ бригадэу Мыекъуапэ щыIэм щытхъуцIэу «гвардейскэр» къыфагъэшъошагъ уIэшыгъэ зэIуупIэныгъэхэм ялъэхъан Хэгъэгумрэ къэралыгъом ифедэхэмрэ якъэухъумэнкIэ бригадэм хэтыбэмэ лIыхъужъныгъэ зэрэзэрахьагъэм фэшI.
«Я 227-рэ гвардейскэ артиллерийскэ бригадэм идзэкIолIхэми ипащэхэми мы хъугъэ-шIагъэмкIэ сыгу къыздеIэу сафэгушIо! Мобилизационнэ IофшIэнымкIи, ныбжьыкIэхэм дзэ-патриотическэ пIуныгъэ ягъэгъотыгъэнымкIи илъэсыбэ хъугъэу бригадэм зэдэлэжьэныгъэ дытиI, хэушъхьафыкIыгъэ дзэ операциер къызежьэм, я 3-рэ Мыекъопэ артиллерийскэ дивизионэу Советскэ Союзым и ЛIыхъужъэу Андырхъое Хъусен ыцIэ зыхьырэр ащ щызэхащагъ. Мы дивизионым идзэкIолIхэм хэушъхьафыкIыгъэ дзэ операциер зыщыкIорэ чIыпIэм япшъэрылъхэр гъэхъагъэ хэлъэу непэ щагъэцакIэх. ТидзэкIолIхэм ТекIоныгъэ къыдахынэу, ядэжь къагъэзэжьынэу сафэлъаIо!» — къащитхыгъ исоциальнэ нэкIубгъохэм АР-м и ЛIышъхьэу КъумпIыл Мурат.