Илъэс пчъагъэхэм цIыфым хэбзэ IофшIэн зигъэцакIэу пенсием зытIысыжьыкIэ, фэгъэкIотэн гъэнэфагъэхэр иIэнхэм щэгугъы. Ахэм ащыщ щытхъуцIэу «IофшIэным иветеран» зыфиIорэр. Сыдэущтэу ар Адыгэ Республикэм щафагъэшъуашэра? Сыдым къыщебгъэжьэщта ыкIи хэта ар зифэшъуашэр? Мы упчIэхэр фэдгъэзагъэх АР-м IофшIэнымкIэ ыкIи социальнэ хэхъоныгъэмкIэ и Министерствэ. ЦIыфхэм социальнэ IэпыIэгъу ягъэгъотыгъэнымкIэ министерствэм иотдел ипащэу Браукъо Валерий «Адыгэ макъэм» джэуапхэр къыритыжьыгъэх.

— Хъулъфыгъэу илъэс 25-м, бзылъфыгъэу илъэс 20-м нахь мымакIэу Iоф зышIагъэхэм е яIофшIэн епхыгъэу нахь пасэу пенсием тIысыжьын фитхэм щытхъуцIэр афагъэнэфэн ылъэкIыщт. Ау ащ пае цIыфым иIэнхэу щыт СССР-м е УФ-м ибгъэхалъхьэхэр, иорденхэр; ­СССР-м е УФ-м ящытхъуцIэхэр; УФ-м и Президент и Щытхъу е и Рэзэныгъэ тхылъхэр; IофшIэным гъэхъагъэхэр зэрэщыриIэмкIэ къулыкъу тамыгъэхэр ыкIи зэпыу фэмыхъоу илъэс 15-м нахь мымакIэу Iоф ышIагъэмэ. Джащ фэдэу щыIэх цIыф купхэр Хэгъэгу зэошхом илъэхъан аныбжь имыкъугъэу IофшIэныр езыгъэжьэгъагъэхэу ыкIи хъулъфыгъэу илъэс 40-м, бзылъфыгъэу илъэс 35-м нахь мымакIэу Iоф зышIагъэхэу пенсие афагъэуцуным ифитыныгъэ зиIэхэр, — къыIуагъ Браукъо Валерий.
ТигущыIэгъу къызэрэхигъэщыгъэмкIэ, «IофшIэным иветеран» зыфиIорэ щытхъуцIэм фэгъэкIотэн гъэнэфагъэхэр цIыфым къыретых. Мыщ ахъщэ тынэу ыкIи фэгъэкIотэнэу пылъхэр шъолъыр пэпчъ щызэфэшъхьафых. Арышъ, ­шъхьадж зыщыпсэурэ чIыпIэм елъытыгъэу цIыфхэр социальнэу ухъумэгъэнхэмкIэ къулыкъухэм ащыкIэупчIэнхэ алъэкIыщт.
— 2024-рэ илъэсыр тштэмэ, Адыгеим щытхъуцIэу «IофшIэным иветеран» зыфиIорэр нэбгырэ 985-мэ, тызхэт илъэсым имэзих – нэбгырэ 204-мэ афагъэшъошагъ. Республикэм щыпсэоу а щытхъуцIэр зиIэхэм мазэ къэс ахъщэ тын аIокIэ (илъэс къэс хэхъо), ыпкIэ хэмылъэу ацэхэр арагъэшIын амал яI, транспортым рызекIонхэмкIэ фэгъэкIотэн къареты, — хигъэунэфыкIыгъ министерствэм иIофышIэ.
КъэIогъэн фае цIыфыр пенсием мыкIозэ мы щытхъуцIэр къыфагъэшъошэн зэралъэкIыщтыр, ау ащ пылъ ахъщэ тыныр пенсием мытIысыжьэу къыратыщ­тэп.
Iэшъынэ Сусан.