Мы мафэхэм «Единэ Россием» игукъэкIкIэ АР-м и Къэралыгъо Совет — Хасэм идепутатхэу Александр Колесниковымрэ Алла Чернышовамрэ Мыекъопэ районым инароднэ депутатхэм я Совет итхьаматэу Алексей Кшняковыр ягъусэу Адыгеим и Мые­къопэ район ит кIэлэцIыкIу зы­гъэпсэфыпIэхэр къаплъыхьагъэх.

Социальнэ мэхьанэ зиIэ псэуалъэхэр уплъэкIугъэнхэр республикэ парламентым иIофшIэнкIэ анахь мэхьанэ зиIэхэм ащыщ, цIыфхэм ящыIакIэ нахьышIу шIыгъэным ар занкIэу епхыгъ. Социальнэ псэуалъэхэр къаплъыхьэхэ зыхъукIэ ежьхэм ашъхьэкIэ зыщагъэгъуазэ кIэлэцIыкIухэм языгъэпсэфынкIэ ыкIи ящынэгъончъэнкIэ амалэу арагъэгъо­тыгъэхэр зыфэдэхэм, кIэлэцIыкIу джэгупIэхэр зэрашIыхэрэр ауплъэкIу хъумэ — ипIалъэм ехъулIэу атыхэмэ ыкIи шап­хъэхэм адештэхэмэ.
«Социальнэ мэхьанэ зиIэ псэуалъэхэр партиеу «Единэ Россием» ифракцие хэт депутатхэм, гъэцэкIэкIо хабзэм, чIыпIэ зыгъэIорышIэжьыпIэхэм ялIыкIохэм, ошIэ-­дэмышIэ IофхэмкIэ къулыкъум хэт­хэм, ны-тыхэм ащыщхэм ыкIи цIыфхэу чIыпIэм щыпсэухэрэм зэгъусэхэу къап­лъыхьэх бэдзэогъум и 1-м къыщыублагъэу шышъхьэIум и 18-м нэс», — къы­Iотагъ Алла Чернышовам.
Инфраструктурэр ауплъэкIугъэ къодыеу щымытэу, депутатхэр кIэлэцIыкIу зыгъэпсэфыпIэу «Лань» зыфиIорэм щыIэхэм адэгущыIагъэх. Мыр нэбгырэ 220-мэ зыщагъэпсэфыным тегъэпсы­хьагъ, сабыибэ зиIэ, зигъот макIэ унагъохэм къарыкIыгъэхэр, зятэхэр хэушъхьафыкIыгъэ дзэ операцием щыIэхэр дэсых. ШIухьафтынэу къафащагъ спорт псэолъакIэхэр — Iэгуаохэр, бадминтон зэрешIэхэрэр, нэмыкIхэр. «Спортыр — псауныгъ, псауныгъэ зиIэ кIэлэ­цIыкIухэр — тикъэкIощт уахът!» — хагъэунэфы­кIыгъ дэкIыгъом хэлэ­жьагъэхэм.

ШышъхьэIум и 3-м къы­щыублагъэу, «Ланим» ия 4-рэ зыгъэпсэфыгъо уахътэ тефэу, Херсон хэ­кум и Геническэ район, Адыгеир зылъыплъэрэм, къикIынхэшъ, зыгъэпсэфакIо мыщ кIэлэцIыкIуи 180-рэ къэкIощт.
Iофтхьабзэм хэла­жьэ­хэрэр зыгъэпсэфыпIэм икIыхи, Мыекъопэ районым ит псэупIэу Каменномостскэм ирайон цIыкIоу «Городок» зыцIэм нэужым кIуагъэх, кIэлэцIыкIу джэгупIэр зыщашIыщт чIыпIэр зэрагъэлъэгъугъ. Мыщ шIэхэу къыщызэтырагъэпсыхьащт щынэгъончъэ те-
хъо зиIэ джэгупIэу ныбжь пстэуми ате­лъытэгъэщтыр (кв.м.300).
Каменномостскэ чIыпIэ коим ипащэу ГукIэлI Аминэт къызэриIотагъэмкIэ, джырэ уахътэм чIыпIэр псэолъэшIыным фагъэхьазыры. ЗэкIэмкIи Iоф­шIэнхэм атефэщтыр сомэ миллиони 3,575-рэ, ащ щыщэу сомэ мин 250-р спонсорхэмрэ мы чIыпIэм щыпсэухэ­рэмрэ къыхалъхьагъ. IофшIэнхэр зэ­рэзэшIуахынхэу агъэнэфагъэм елъы­тыгъэу, чIыпIэр затыщтыр мы илъэсым иIоныгъо мазэ ыкIэхэм адэжь.