ШIэныгъэ фестивалэу Урысые кIэлэцIыкIу гуп­чэу «Сменэм» щыкIуагъэм нэбгырэ минитIум ехъу хэ­лэжьагъ. Ахэр Урысыем, Абхъазым ыкIи Къыблэ Осетием къарыкIы­гъэх.

Урысые шIэныгъэ-гъэгъозэн проектэу «Наука вокруг. Открытия продолжаются» зыфиIорэм къыдыхэлъытагъэу ар зэхащагъ. Урысые Федерацием гъэсэныгъэмкIэ и Министерствэ игрантэу Адыгэ къэралыгъо университетым къыдихыгъэм ишIуагъэкIэ гухэлъыр щыIэныгъэм щыпхыращы. Апэрэ фестивалитIоу зэхащагъэхэм Урысыем ишъо­лъыр 68-мэ, Абхъазым, Къыблэ Осетием къарыкIыгъэхэу мэкъу­огъу ыкIи бэдзэогъу мазэхэм лагерым зыщызыгъэпсэфыхэрэр ахэлэжьагъэх.
ШIэныгъэ фестивалым идэкIыгъо IофшIэн зы маф зэрэкIорэр. Тематическэ площадкэ 30-у го­щыгъэхэу джэгукIэ шIыкIэм тетэу биологием, физикэм, астрофизикэм, химием, IT лъэныкъохэм, хьисапым япхыгъэу яшIэныгъэ­хэм ахагъахъо. Зэнэкъокъухэри кIэлэцIыкIухэм афызэхащэх. ШIэ­ныгъэ кином илабораторие нэIуасэ фэхъух ыкIи урысые шIэ­ныгъэлэжь цIэрыIохэр лекциехэм къафеджэх.
— Естественнэ ыкIи хьисап шIэныгъэхэмкIэ, информационнэ технологиехэмкIэ шIэныгъэлэжьхэм яIофшIагъэхэр зэлъя­гъэшIэгъэныр ары проектым ипшъэрылъ шъхьаIэр. Iофтхьа­бзэм ишIуагъэкIэ кIэлэеджакIо­хэр шIэныгъэ зэфэшъхьафхэм нахь афэщагъэ мэхъух, кIэлэ­еджакIохэр шIэныгъэм игъогу техьанхэмкIэ IэпыIэгъу къа­фэхъу, — къыIуагъ Адыгэ къэ­ралыгъо университетым гу­хэлъ ушэтынхэмкIэ идепартамент ипащэу Елена Куква.

ЯтIонэрэ фестивалэу мы тхьаумафэм «Сменэм» щыкIуагъэм нэбгырэ миным ехъу хэлэжьагъ, ахэр Урысыем ишъо­лъыр 64-мэ ыкIи Абхъазым къарыкIыгъэх. КIэлэеджакIохэр «Научнэ мастерскоим» щаугъоигъэх, хьисапым епхыгъэ хыры­хыхьэхэр къашIагъэх, ушэтын зэфэшъхьафхэм ахэлэжьагъэх. Тыгъэ системэр зэрэзэхэлъым нэIуасэ фэхъугъэх, цIыфым и ДНК имодель зэхагъэуцуагъ, куп-купэу гощыгъэхэу «Стихи науки» зыфиIорэ интеллектуальнэ джэгукIэм щызэнэкъокъугъэх, физическэ биатлонымкIэ ыкIи дрон-баскетболымкIи заушэтыгъ, джащ фэдэу сурэттехынымкIэ анахь дэгъухэр къыхахыгъэх.
Урысыем щызэлъашIэрэ шIэныгъэлэжь-астрономэу, Иркутскэ къэралыгъо университетым и Астрономическэ обсерваторие ипащэу, физикэ-хьисап шIэныгъэхэмкIэ докторэу Сергей Язе­вым ныбжьыкIэхэр игъусэхэу тыгъэ системэм ыкIи нэмыкI планетэхэм япхыгъэ ушэтынхэр ашIыгъэх.
ШIэныгъэ кином илабораторие документальнэ фильмэу «Влюб­ленные в математику» щеплъы­гъэх. Режиссерэу Ольга Ажнакинам ыгъэуцугъэ фильмыр шIэ­ныгъэлэжь ныбжьыкIэхэм къатегущыIэ.
КIэлэеджакIохэм апае фестивалыр джы «Орленкэм» щы­кIощт. Ащ ыуж джыри фести­валищ зэхащэнэу агъэнафэ.
АКъУ-м ипресс-къулыкъу.