ЗитеплъэкIэ лъэшэу зызэблэзыхъурэ къалэу Мыекъуапэ дэт псыутхыхэр ащ изы IахьышIу ­хъугъэх. Гъатхэр къызщихьагъэм щегъэжьагъэу бжыхьэм икIэух нэс ахэм Iоф ашIэ.

Республикэм икъэлэ шъхьаIэ щыпсэу­хэрэм анэмыкIэу, мыщ къыдэхьэрэ хьакIэхэри ащ егъэгушIох, цIыфкIопIэ­шхохэу щытых.
Псыутхыхэм яIофшIэн ыкIи ахэр зэрагъэфедэхэрэр, ахэм къящэлIэгъэ ин­женер коммуникациехэр зэрэлажьэхэрэр, цIыфхэм а чIыпIэхэм зызэрэщагъэ­псэфын фэе шапхъэхэр гъэнэфагъэх.
Ау Iэмэ-псымэ е псэолъэ ин пэпчъ, охътэ гъэнэфагъэрэ Iоф зишIэрэм, узыгъэгумэкIын лъэныкъо горэ иIэу зэрэщытыр нафэ къэхъу.
Непэ зигугъу къэтшIымэ тшIоигъор псыутхыхэм арыт псыхэм цIыфхэр зэрахахьэхэрэр ыкIи ны-тыхэм сабыйхэр а псыхэм зэрэхатIупщыхьэхэрэр ары.

Псыутхыхэм афэгъэхьыгъэ ­шапхъэу щыIэхэр ыкIи бгъэцэ­кIэн фаер:
— Ахэм арыт псым уахахьи защыбгъэпскIи хъущтэп.
— Псым ычIэгъ чIэт Iэмэ-псымэ зэ­фэ­шъхьафхэм, псыр къезыфэкIыхэрэр ахэт­хэу, уIагъэхэр е шъобж къыптыращэнхэ алъэкIыщт.
— Псым хэт Iэмэ-псымэхэм ащыщхэм электричествэр къякIуалIэ ыкIи ар псыутхым зэрэпсаоу щагъэфедэ, ащ пае нахь лъэшэу усакъынэу щыт.
— Псым ухэхьащтыр хэгъэкIи, ухэмыIабэми нахьышIу, сыда пIомэ хьэхэр ыкIи бзыухэр а псым ешъонхэ алъэкIыщт.
— Псыутхым псыр Iэмэ-псымэхэмкIэ къырефэкIыми, гъэмафэм, дунар зыщыфэбэ дэдэм, ащ кIэтIый уз зэ­фэшъхьафхэр къыхэпхынхэкIэ щынагъо.
Шапхъэу щыIэхэм къызэрадалъытэу, псыутхыхэр къулыкъу зэфэшъхьафхэм игъом ауплъэкIух, ау сакъыныгъэр цIыф­хэмкIэ, анахьэу сабый зиIэхэмкIэ, анахь шъхьаIэу щытын фае.
Шъугу къэдгъэкIыжьын: къалэу Мые­къуапэ игупчэ щашIыгъэ псыутхыр тиреспубликэкIэ анахь ин ыкIи анахь дах. Ащ мафэ къэс, пчэдыжьым сыхьатыр 10-м щегъэжьагъэу пчыхьэм сыхьатыр 9-м нэс, къызэрыкIо шIыкIэм тетэу Iоф ешIэ. Нэужым, пчыхьэм сыхьатыр 9-м щегъэжьагъэу, зы сыхьатырэ псыутхым ит псыр орэдэу къыкIэхьагъэм диштэу еутхэ ыкIи лъагэу дефые, а лъэхъаным ащ графикэ шIыкIэм тетэу псым щыпхырыщыгъэу сурэтхэри щыплъэгъунхэ плъэкIыщт.
Мы мафэхэм Мыекъуапэ игупчэ ит псыутхым псыр рагъэчъыгъэу ащ ит Iэмэ-псымэхэр ауплъэкIух, ыкIоцIи агъэ­къабзэ. А IофшIэнхэр заухыхэрэм, бэ тырамыгъашIэу псы къабзэр рагъэхъожьыщт ыкIи псыутхым Iоф ышIэу ыублэжьыщт.
Гъомлэшк Байзэт.