Мы мафэхэм тиреспуб­ли­кэкIэ машIор къэхъуным ищынагъо класси 4-м ыкIи класси 5-м анэсы. Анахьэу бэдзэогъур жъоркъэу зэрэщытым къыхэ­кIэу машIом ищынагъо зы­къиIэтыгъ.

БлэкIыгъэ чэщ-зымафэм рес­публикэм гъогогъуи 10-рэ машIор къыщыхъугъэу агъэунэфыгъ, ахэм ащыщэу 9-м уц гъугъэм, тхьапэхэм ыкIи хэкIым машIор къакIэнагъ. Квадрат метрэ
600-м къыриубытэу машIом зиштэгъагъ. Ар игъом агъэкIосэжьыгъ, зыпари хэкIодагъэп.
Шъугу къэдгъэкIыжьын, мэз­хэм машIор къащымыхъуным фэшI Iофтхьэбзэ гъэнэфагъэхэр зэрахьагъ. Анахьэу мэкъумэщ хъызмэтшIапIэ зиIэхэм унэшъо пытэхэр афашIыгъ. АР-м мэкъу-­мэщымкIэ и Министерствэ ма­шIор щынэгъончъэу щытынымкIэ дэкIыгъо Iофтхьабзэхэр зэ­хещэх. Специалистхэр мэкъумэщышIэхэм къяджэ игъом уцыр аупкIэнэу, чIыгур ажъонэу, джащ фэдэу лэжьыгъэр зытырахы­жьырэ чIыгур уцыжъхэм зэлъамыштэным лъыпъэнхэу.
Урысыем ошIэ-дэмышIэ Iоф­хэмкIэ и Министерствэ и ГъэIорышIэпIэ шъхьаIэу АР-м щыIэм ипащэ игуадзэу, лъыплъэнымкIэ ыкIи пэшIорыгъэшъ IофшIэнымкIэ гъэIорышIапIэм ипащэу Анд­рей Колесник къызэриIуагъэмкIэ, машIор къызэкIэнэным лъа­псэ фэхъурэр ащ зэрэфэмыса­къыхэрэр ыкIи игъо мыхъугъэу чIыгу Iахьхэр зэрагъэкъа­бзэхэ­рэр, фабэр къэзытырэ пкъыгъо­хэм ягъэфедэн шапхъэу пылъхэр зэраукъохэрэр, электрорыкIуапIэхэр зэрэзэщыкъуагъэхэр, джащ фэдэу электри­чествэкIэ Iоф зышIэрэ пкъы­гъохэр агъэфедэ хъумэ сакъыныгъэ къызэрэзыхамыгъафэрэр ары.

— МашIор къэхъуным ищына­гъоу щыIэхэм такъыпкъырыкIызэ, уплъэкIун-лъыплъэн Iоф­тхьа­бзэхэр ретэгъэкIокIых. Псэуа­лъэр зыфытегъэпсыхьагъэм ыкIи машIор щынэгъончъэу щыты­нымкIэ IофшIэнэу зэрахьэхэрэм ялъытыгъэу щынагъор зыфэдизыр тэгъэунэфы. МашIор щынэгъончъэным ишапхъэхэм атетэу псэуалъэр нахь зэтемыгъэпсы­хьагъэ къэс анахь щынагъо къэ­зытыхэрэм ар ахалъытэ. Ащ елъытыгъэуи планым хэтэу уплъэкIун-лъыплъэн Iофтхьабзэ­хэр илъэс къэс зэхэтэщэх, — къыIуагъ А. Колесник.
ТапэкIи машIом епхыгъэ тхьа­мыкIагъоу къэхъухэрэм япчъагъэ нахьыбэ мыхъуным фэшI ГъэIорышIапIэм икъулыкъушIэхэм мэкъумэщ хъызмэтшIапIэхэм, джащ фэдэу организациехэм япащэхэм зафагъазэ игъом ячIыгу Iахьхэр агъэкъэбзэнхэу ыкIи уц гъугъэр агъэсты хъумэ, шапхъэхэр амыукъонхэу.
Урысыем ошIэ-дэмышIэ Iоф­хэмкIэ и Министерствэ и ГъэIорышIэпIэ шъхьаIэ цIыфхэм за­къыфегъазэ сакъыныгъэ къызхагъэфэнэу, машIор щынэгъончъэу щытынымкIэ шапхъэхэр амыукъонхэу, фабэр къэзытырэ Iэмэ-псымэ къута­гъэхэр амы­гъэфедэнхэу, унэр къабгынэ хъумэ, электричест­вэкIэ Iоф зы­шIэрэ пкъыгъохэр пачынхэу.
ТхьамыкIагъо къэмыхъуным пае кIэлэцIыкIухэм сырнычыр къамыштэным шъунаIэ тежъу­гъэт. ЭлектричествэкIэ Iоф зы­шIэрэ пкъыгъохэм яшъумыгъаIэх, хьакум машIо пэлъэу, телевизорым Iоф ышIэу, электричествэкIэ лэжьэрэ нэмыкI пкъыгъохэр пыгъэнагъэхэу язакъоу сабыйхэр унэм къишъумынэх.
КIАРЭ Фатим.