АР-м и Правительствэ зычIэт унэм Адыгеим и ЛIышъхьэу ­КъумпIыл Мурат хэушъхьафыкIыгъэ дзэ операцием иветеранэу Сергей Ковалевым ­зэIукIэгъу щыдыриIагъ. Программэу «ЛIыхъужъхэм ­яуахът» зыфиIорэм тегъэ­псыхьагъэу республикэм и ЛIышъхьэ ащ гъэсакIо фэхъугъ.

ЗэдэгущыIэгъум хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец ыкIи АР-м идзэ комиссарэу Александр Авериныр.
Урысыем и Президентэу Владимир Путиныр программэу «ЛIыхъужъхэм яуахът» зыфиIорэмрэ ащ ехьыщыр шъо­лъыр программэхэмрэ кIэщакIо афэхъугъ. Ахэр зыфытегъэпсыхьагъэхэр хэушъхьафыкIыгъэ дзэ операцием хэлажьэхэрэр, ащ иветеранхэр къэралыгъо ыкIи муниципальнэ гъэIорышIэнымкIэ къулайныгъэхэм афэгъэсэгъэнхэр, IофышIэ гъэнэфагъэхэм япчъагъэ игъэкъу­гъэныр ары.
Сергей Ковалевыр федеральнэ проектым хэлажьэ. 2016-рэ илъэсым къыщегъэжьагъэу 2021-м нэс Адыгэ Респуб­ликэм дзэ къулыкъур ащ щихьыгъ, етIанэ хэушъхьафыкIыгъэ дзэ операцием хэлэжьагъ. Ащ ЛIыхъужъныгъэм иордениплI, медальхэу «Хэгъэгум ыпашъхьэ гъэхъагъэу щыриIэхэм апае», «Блэнагъэу зэрихьагъэм пае» зыфиIохэрэр, Жуковым ыцIэкIэ щытыр ыкIи нэмыкI къулыкъу тынхэр къыфагъэшъошагъэх.
ГъэцэкIэкIо хабзэм ишъолъыр къулыкъухэм гъэпсыкIэу яIэм, къэралыгъо къулыкъум иправовой лъапсэхэм, Къэралыгъо Советым – Хасэм ыкIи парламентым иаппарат яIофшIэн зэрэгъэпсыгъэм, хэбзэгъэуцугъэхэм язэхэгъэуцонрэ яштэнрэ зэрэкIохэрэ шIыкIэм, АР-м и ЛIышъхьэрэ АР-м иминистрэхэм я Кабинетрэ я Администрацие иIофшIэн зэрэгъэпсыгъэм, къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ иIофшIэн зэрэзэхэщагъэм ащ защигъэгъозэщт.
ЗэригъэшIэщтхэм ащыщых: бизнесым IэпыIэгъу етыгъэнымкIэ инфраструктурэр, мэкъумэщ продукцием икъыдэгъэкIынкIэ Iофыгъоу къэуцухэрэр. Предпринимательхэм IэпыIэгъу ятыгъэнымкIэ Фондым иIофшIэн зэрэзэхэщагъэм, бизнес-инкубаторхэм япхыгъэ Iофыгъохэм нэIуасэ зафишIыщт. Унэгъо былымэхъо фермэхэм, фермер хъызмэтшIапIэхэм, муниципалитетхэм, чIыпIэ зыгъэIорышIэжьыным икъулыкъухэм яIофшIэн зэрэзэхэщагъэми зыщигъэгъозэщт.
Адыгеим и ЛIышъхьэ Сергей Ковалевым гущыIэгъу зыфэхъум къызэрэхигъэщыгъэмкIэ, пэщэныгъэ зезыхьащт IофышIэхэм ягъэхьазырын къэралыгъом ипащэ кIэщакIо зыфэхъугъэ лъэныкъохэр щыIэныгъэм пхырыщыгъэнхэмкIэ, зэшIохыгъэн фэе Iофыгъоу къэуцухэрэр гъэцэкIэгъэнхэмкIэ мэхьанэшхо иI.
«Урысыем и Президентэу Владимир Путиныр кIэщакIо зыфэхъугъэ кадрэ проектхэм ахэлажьэхэрэм сэ IофшIэкIэшIоу сIэкIэлъ хъугъэмкIи, сишIэныгъэ­хэмкIи садэгощэщт сигуапэу. Программэу «ЛIыхъужъхэм яуахът» зыфиIорэр хэушъхьафыкIыгъэ дзэ операцием иветеранхэм IэпыIэгъу ятыгъэнымкIэ анахь мэхьанэ зиIэ Iофтхьабзэхэм зыкIэ ащыщ, тидзэкIолIхэм мамыр IофшIэным зыфагъэхьазырынымкIэ, яамалхэр икъоу къызэIуахынхэмкIэ Iэрыфэгъоу ар щыт. ТиреспубликэкIи, тихэгъэгукIи ухъумакIохэм къулайныгъэу аIэкIэлъ хъугъэм ишIогъэшхо къэкIощт. Ахэм теубытагъэ ахэлъэу, сыд фэдэ къиныгъуи пэуцужьынхэм фэхьазырхэу, апашъхьэ къитэджэрэ Iофыгъохэм еплъыкIэ гъэнэфагъэ афыряIэу, нахь шIогъэ ин къэзыхьыщт зэшIохыкIэхэр къагъотынхэ алъэкIыщт. Проектым хэлэжьэрэ пстэуми къагъэшъыпкъэжьыгъ я Хэгъэгу шIулъэгъоу фыряIэр, ащ ифедэхэм зэрафэшъыпкъэхэр. ТицIыфхэм ящыIакIэ нахьышIу хъуным акIуачIэ зэрэфагъэIорышIэщтым сицыхьэ телъ», - къыIуагъ КъумпIыл Мурат.
2025-рэ илъэсым мэзаем къыщегъэ­жьагъэу программэу «ЛIыхъужъхэм яуахът» зыфиIорэм сэнэхьатхэм афэгъэ­хьазырыгъэнхэмкIэ ишъолъыр программэу «Адыгеим и ЛIыхъужъхэр» ублагъэ хъугъэ. Ащ хэлэжьэнхэу нэбгырэ 38-рэ къыхахыгъ. Мы илъэсым шышъхьэIум ахэм яегъэджэн рагъэжьэщт, Мыекъопэ къэралыгъо технологическэ университетым къэралыгъо къулыкъушIэхэм яшIэныгъэхэм ахэгъэхъогъэнымкIэ и Гупчэ ахэр щеджэщтых: зэдэлэжьэныгъэмкIэ зэзэгъыныгъэхэр адашIыгъэх хъызмэт зехьанымкIэ ыкIи къэралыгъо къулыкъушIэнымкIэ Урысыем иакаде­миеу УФ-м и Президент дэжь щылажьэрэмрэ мысатыу организациеу «Урысыер – амалхэм яхэгъэгу» зыфиIорэмрэ. Мы программэм хэлажьэхэрэм яегъэджэкIощтых шIэныгъэлэжьхэр, хабзэм ишъо­лъыр ыкIи имуниципальнэ къулыкъухэм япащэхэр, бизнесым илIыкIохэр, нэмыкI­хэри.
АР-м и ЛIышъхьэ ипресс-къулыкъу