АР-м иминистрэхэм я Кабинет хэтхэм япланернэ зэIукIэ ­Адыгеим и ЛIышъхьэу ­КъумпIыл Мурат зэрищагъ. АР-м и Къэралыгъо Совет – Хасэм и Тхьаматэу Владимир Нарожнэр ащ хэлэжьагъ. Хыныгъор зэрэкIорэр зытегущыIагъэхэм зыкIэ ащыщ.

АР-м мэкъу-мэщымкIэ иминистрэу Къуанэ Анзаур къызэриIуагъэмкIэ, бжыхьасэхэмрэ джэнч лъэпкъ зэфэшъхьафхэмрэ гектар мини 108-рэ фэдиз зэлъаубытыщтыгъ. Муниципальнэ образованиехэм бжыхьэсэ хьэм иIухыжьын ащаухыгъ. ПстэумкIи хьэ тонн мин 42,8-рэ къаугъоижьыгъ, гурытымкIэ зы гектарым центнер 51-рэ къырахыжьыгъ. ГъэрекIорэм егъэ­пшагъэмэ, центнери 3,9-кIэ ар нахьыб. Рапсымрэ тритикалемрэ яIухыжьын аухыгъ. Муниципальнэ образованиехэм бжыхьэсэ коцым иIожьын мы охътэ благъэм ащаухынэу рахъухьэ. Бэдзэ­огъум и 21-м ехъулIэу коц гектар мин 88,6-м щыщэу гектар мин 63,1-р аIожьыгъагъ. ПстэумкIи коц тонн мин 348-рэ фэдиз къахьыжьыгъ, гурытымкIэ зы гектарым центнер 59,4-рэ къырахыжьыгъ. Джэджэ районым ичIыгулэжьхэр ары нахьыбэу лэжьыгъэ къэзыхьыжьыгъэхэр. Ахэм зы гектарым коц центнер 63,7-рэ къырахыжьыгъ.
АР-м мэкъу-мэщымкIэ иминистрэ къызэриIуагъэмкIэ, чIыопсым изытет зэрэдэгъум елъытыгъэу чIэнагъэ амышIэу, агротехническэ охътэшIухэм адиштэу хыныгъор аухын алъэкIыщт. Адыгеим и ЛIышъхьэ пшъэрылъ афигъэ­уцугъ охътэ кIэкIым Iоныгъор ухыгъэнымкIэ амалэу яIэр зэкIэ муниципальнэ образованиехэм рахьылIэнэу, лэжьыгъэм икъэухъумэнкIэ ыкIи иIугъэкIынкIэ мэкъу-мэщым продукциер къыщызыхьыжьыхэрэм зэрафэлъэкIэу адеIэнхэу. Фитосанитарием ылъэныкъокIэ гъэтхасэхэм язытет епхыгъэ Iофыгъохэм зэIукIэм анаIэ щатырагъэтыгъ. Муниципалитетхэм пшъэрылъ афашIыгъ мафэ къэс уплъэкIунхэр зэхащэхэзэ ашIынэу, игъом лэжьыгъэхэм яшIушIэнхэу, мэкъу-­мэщым ипсэуалъэхэм машIом закъыщимыштэнымкIэ ищыкIэгъэ амалхэр зэрахьанхэу.
Республикэм и ЛIышъхьэ АР-м мэкъу-мэщымкIэ и Министерствэрэ муниципалитетхэм яадминистрациехэм япащэхэмрэ агу къыгъэкIыжьыгъ къэралыгъо IэпыIэгъоу щыIэхэмкIэ мэкъу-­мэщым лэжьыгъэр къыщызыхьыжьыхэрэм макъэ ягъэIугъэнымкIэ Iофэу ашIэрэр зэрэлъагъэкIотэн, лъэIу тхылъхэм язэхэгъэуцонкIэ фермерхэм IэпыIэгъу зэрафэхъунхэ фаер. ПстэумкIи респуб­ликэм и АПК изегъэушъомбгъун сомэ миллион 500-м ехъу гъэрекIо пэIуагъэ­хьагъ, мыгъэ сомэ миллион 900-м ехъу ащ тырагъэкIодэнэу рахъухьэ.
«ЧIыгулэжьхэми, хэбзэ къулыкъухэми непэ акIуачIэ зэрахьылIэрэр гъэхъагъэ хэлъэу Iоныгъор ухыгъэныр ары. Лэжьыгъэ дэгъу тилэжьэкIупIэхэм къарахынэу тэгугъэ. АщкIэ зишIуагъэ къэкIуагъэр чIыопсым изытет зэрэдэгъугъэр ары. Ау апэрэ чэзыоу ар къызыкIэкIуагъэр шIуагъэ къытэу чIыгулэжьхэм Iоф зэрашIагъэр, чылапхъэм игъэфедэнкIэ екIолIэкIэ тэрэз къызэрэхахыгъэр ары. ХъызмэтшIэпIэ пэрытхэм IофшIэкIэшIоу аIэкIэлъыр нэмыкIхэм алъыгъэIэсыгъэн, ахэр яIофшIэн кIэгъэгушIугъэнхэ фае. ЧIыгум дэлажьэ зышIоигъо пстэуми тишIуагъэ ядгъэкIыщт, кIэухышIухэм такъызэрафэкIощтым ыуж титыщт», —къыIуагъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.