Мы аужырэ илъэсхэм шапхъэхэм адиштэу гъогухэр зэтегъэпсыхьэгъэнхэм Адыгэ Республикэм лъэшэу анаIэ щытырагъэты. Адыгеим и ЛIышъхьэу КъумпIыл Мурат зэрэхигъэунэфыкIыгъэу, респуб­ликэм фэхъурэ зэхъокIыныгъэхэм азыныкъо нахьыбэр зэпхыгъэр ­лъэпкъ проектхэр ары. «ЩыIэныгъэм пае инфраструктурэр» зыфиIорэ лъэпкъ проектым диштэу шъолъыр, чIыпIэ мэхьанэ зиIэ гъогухэр республикэм щагъэцэкIэжьых.

Муниципальнэ образованиеу «Яблоновскэ къэлэ псэупIэм» иадминистрацие къызэритыгъэмкIэ, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Дортранссервисым» иподряднэ организацие иIофышIэхэм Яблоновскэм иурамэу Совхознэм изы Iахьэу метрэ 800 зикIыхьагъэм игъэцэкIэжьын аухы. Асфальтыжъэу ащ телъыгъэр гъогушIхэм тырахыгъ, ощхыпсыр зэрылъэ­дэщт трубэхэр чIалъхьагъэх, остыгъэхэр тырагъэуцуагъэх. Мы охътэ благъэм мыжъуакIэрэ мастикэрэ зыхэлъ асфальт­бетоныр гъогум тыралъхьащт, лъэс гъо­гухэр зэтырагъэпсыхьащтых.
ГъэцэкIэжьын IофшIэнхэм апэIухьанэу сомэ миллион 89-рэ фэдиз къатIупщыгъ.
Шъугу къэтэгъэкIыжьы лъэпкъ проектым диштэу муниципальнэ гъогухэм яIахьи 4-у километри 3,6-рэ зикIыхьагъэр мы илъэсым федеральнэ шапхъэхэм адиштэу зэтырагъэпсыхьан зэрямурадыр.
АгъэцэкIэжьынэу щытыгъэ псэуалъэ­хэм ащыщэу зыр атыгъах. Ар урамэу Промышленнэм изы Iахьэу километрэ 1,1-рэ зикIыхьагъэр, зизэтегъэпсыхьан щылэ мазэм аухыгъэр ары. ПIалъэм ыпэ итхэу IофшIэнхэр зэхащэн языгъэлъэкIыгъэр нахь пасэу зэзэгъыныгъэ зэрадашIыгъэр, дунаир зэрэфэбагъэр ары.
ПсэупIэм иадминистрацие къызэритыгъэмкIэ, Яблоновскэм иурамхэу Юбилейнэмрэ Свободэмрэ джырэ шапхъэхэм адиштэу мыгъэ зэтырагъэ­псыхьащтых.
Лъэпкъ проектэу «ЩыIэныгъэм пае инфраструктурэр» зыфиIорэр гъогу-транспорт инфраструктурэ щынэгъончъэм изегъэушъомбгъун зэрэфэIорышIэрэр тицыхьэ телъэу къэтIон тлъэ­кIыщт.