Къуалъхьэ ыштагъэуагъэмысэ
Адыгеим щыIэ лицензионнэ-Iизын IофхэмкIэ гупчэм ипащэ игуадзэу Iоф зышIэщтыгъэм бэ хъурэ къуалъхьэр къаIихыгъэу къаубытыгъ.
Урысыем и Следственнэ комитет АР-мкIэ иследственнэ ГъэIорышIапIэ анахь мэхьанэшхо зиIэ Iофхэм язэхэфынкIэ иотдел иIофышIэхэм Росгвардием и ГъэIорышIапIэу АР-м щыIэм лицензионнэ-Iизын IофхэмкIэ гупчэм ипащэ игуадзэ ылъэныкъокIэ уголовнэ Iоф къызэIуихыгъ. Бэ хъурэ къуалъхьэ къызэраIихыгъэм фэшI ар агъэмысэ.
ЗэрагъэунэфыгъэмкIэ, 2025-рэ илъэсым бэдзэогъум и 16-м пэщэ IэнатIэ зыIыгъыгъэм сомэ миллионым ехъурэ къуалъхьэр къаIихыгъ. Ащ къепхыгъэу гупчэм Iоф щызышIэрэр иIэнатIэкIэ дигъэкIоенэу, джащ фэдэу унэе ухъумэкIо предприятиехэм апае къулыкъушIэхэр зыщагъэхьазырырэ гъэсэныгъэ учреждениер къыгъэгъунэнэу ыгъэгугъагъэх.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм Росгвардием щынэгъончъэнымкIэ икъулыкъу игъусэу пэщэ IэнатIэ зыIыгъыр хэбзэнчъэу зэрэзекIуагъэр къычIагъэщыгъ.
Мы мафэхэм хьыкумым иунашъокIэ ар аубытыгъэу охътэ гъэнэфагъэкIэ зыщаIыгъырэ хьапсым чIэс.
Следовательхэмрэ криминалистхэмрэ следственнэ Iофтхьабзэхэр зэрахьэх, хъулъфыгъэм нэмыкI бзэджэшIагъэ зэрихьагъэмэ ауплъэкIу.