Къоджэ псэупIэхэм Iэрыфэгъу щыIакIэр ащыгъэпсыгъэным, гуIэтыпIэу ахэр щытынхэм фэшI республикэм щызэшIуахырэр макIэп. Къэралыгъо программэу «Къоджэ псэупIэхэм хэхъоныгъэ ягъэшIыгъэныр» зыфиIорэм къыдыхэлъытагъэу Кощхьаблэ псэолъакIэхэр щашIых, гъэцэкIэжьын IофшIэнхэр щэкIох.

Районым гъэсэныгъэмкIэ и ГъэIорышIапIэ испециалист шъхьаIэу Зэхъохъу Артур къызэрэтиIуагъэмкIэ, къуаджэм игупчэ сабый нэбгыри 100 зычIэфэщт кIэлэцIыкIу IыгъыпIэ щашIы. IофшIэнхэр гъэтхэпэ мазэм аублагъэх. КъатитIоу зэтетыщт псэуалъэр аужырэ шапхъэхэм адиштэу гъэпсыгъэщт. МэзитIум къыщегъэжьагъэу зыныбжь кIэлэцIыкIухэр щаIыгъынхэм ар фытегъэпсыхьэгъэщт. Зэзэгъыныгъэу ашIыгъэмкIэ, 2027-рэ илъэсым мэкъуогъу мазэм IофшIэнхэр аухынхэу щыт, ау нахь псынкIэу псэ­уалъэр атынэу агъэнафэ. Мы чIыпIэм кIэлэцIыкIу IыгъыпIэ щытыгъ, ау жъы зэрэхъугъэм къыхэкIэу бэшIагъэу Iоф ышIэжьыщтыгъэп. ПсэолъакIэр къуаджэм ищыкIэгъэ дэдагъ.
Тэ ащ тызэкIом, лъакъор аIэтыгъэу, чIыунэм IофшIэнхэр щыкIощтыгъэх. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Марк-Сервисыр» ары кIэлэцIыкIу IыгъыпIэр зышIырэр. Ащ ипащэу Абрэдж Айдэмыр къызэриIуагъэмкIэ, шапхъэхэм адиштэу IофшIэнхэр агъэцакIэх. Мафэм нэбгырэ 50-м ехъу мыщ щэлажьэ. КIэлэцIыкIу IыгъыпIэм ишIын заухыкIэ щагум изэтегъэпсыхьан ыуж ихьащтых.
Атлетикэ онтэгъумкIэ спорт псэуа­лъэм ишIыни къуаджэм щэкIо. ЗэкIэмкIи ащ квадрат метрэ 850-рэ ыубытыщт. Псэуалъэм икъэIэтын ыуж ихьагъэх, Iоф­шIэнхэр чанэу зэкIэлъэкIох. ПсырыкIуа­пIэхэр агъэпсыгъэх. КIэлэцIыкIу-Iэтэхъо спорт еджапIэ къуаджэм дэт нахь мышIэми, ар зэрэцIыкIум ыпкъ къикIыкIэ бэп аштэн алъэкIыщтыгъэр. Къуа­джэми, районми спортым мэхьанэшхо щыраты, спортсмен цIэрыIохэр бэу къыдэкIыгъэх. НыбжьыкIэхэм спортымкIэ гъэхъагъэхэр ашIынхэмкIэ мы псэолъакIэм ишIуагъэ къэкIощт. Аужырэ шапхъэхэм адиштэрэ Iэмэ-псымакIэхэр чIэтыщтых.
Физкультурэм зыщыпылъхэ, псауныгъэр зыщагъэпытэрэ зэIухыгъэ комплексым игъэпсын джащ фэдэу Кощхьаблэ зэрифэшъуашэу щызэшIуахы. ЦIыфхэмкIэ ар гуIэтыпIэу хъунэу мэгугъэх. ЧIыпIэм фонтан хэтыщт, тетIысхьапIэхэр, чъыгхэр, къэгъагъэхэр дахэу Iутыщтых, къэнэфыщт. Спортивнэ Iэмэ-псымэ зэфэшъхьафхэмкIэ ар зэтегъэ­псыхьэгъэщт. КIэлэеджакIохэм ямыза­къоу, къоджэдэсхэми яуахътэ шIуагъэ хэлъэу щагъэкIон алъэкIыщт. Спорт зэнэкъокъу зэфэшъхьафхэр щырагъэ­кIокIыщтых.
Къэралыгъо программэу «Къоджэ псэупIэхэм хэхъоныгъэ ягъэшIыгъэныр» зыфиIорэм къыдыхэлъытагъэу культурэм и Унэ игъэкIотыгъэ гъэцэкIэжьынхэр щэкIох. Илъэсым иублэгъум IофшIэнхэр рагъэжьагъэх. ЗэкIэмкIи квадрат метрэ 700-м нахьыбэ хъурэ псэуалъэм дэпкъ къодыехэр къанэу агъэкъэбзагъ. ДжырэкIэ унашъхьэр зэблахъу. Ащ ыуж унэ кIоцIым игъэкIэжьын ыуж ихьащтых.
Адыгэ Республикэм и ЛIышъхьэу КъумпIыл Мурат шъолъырым щыпсэухэ­рэм ящыIакIэ нахьышIу хъуным, къуа­джэхэм ясоциальнэ инфраструктурэ хэхъоныгъэ ышIыным, къоджэдэсхэмкIэ мэхьанэшхо зиIэ проектхэр зэшIохыгъэ хъунхэм мэхьанэшхо реты. Къэралыгъо программэм ишIуагъэкIэ Кощхьаблэ хэхъоныгъэу ышIыщтхэр нэрылъэгъу къытфэхъугъ. ЦIыфхэм ящыIэкIэ-псэукIэ нахьышIу хъуным фытегъэпсыхьэгъэ псэуалъэхэм яшIын ыкIи ягъэкIэжьын бэ темышIэу аухыщтых.
ДЕЛЭКЪО
Анет.