Адыгэ Республикэм IофшIэнымрэ социальнэ хэхъоны­гъэмрэкIэ иминистрэ игуадзэу агъэнэфагъ Елена Юрченкэр.

Ащ ыпэкIэ илъэс 13-рэ пшъэрылъыбэ зэшIозыхырэ Гупчэм (МФЦ-м) пэщэныгъэ ащ дызэрихьагъ. Джы ащ ычIыпIэ ихьагъэр ЛIыхэсэ Рустам. Ащ фэгъэ­хьыгъэу къыIуагъ АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч.
Елена Юрченкэр зыныбжь хэкIотагъэ­хэмрэ сэкъатныгъэ зиIэхэмрэ яIофыгъо­хэм ауж итыщт, щэфын Iофхэм, мысатыу организациехэм ишIуагъэ аригъэ­кIыщт, Гупчэу зигугъу къэтшIыгъэм гъу­сэныгъэ дыриIэщт. АР-м иминистрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловым министрэм игодзакIэ нэIуасэ фишIыхэзэ къызэрэхигъэщыгъэмкIэ, Адыгэ Республикэм IофшIэнымрэ социальнэ хэхъоныгъэмрэкIэ и Министерствэ мэхьанэшхо иI цIыфхэм Iоф адэшIэгъэнымкIэ. Ащ дакIоу къыIуагъ игъом ыкIи икъоу цIыфхэм ящыкIэгъэ IэпыIэгъур ягъэгъотыгъэн зэрэфаер.
Гупчэм пэщакIэу фашIыгъэми пшъэ­рылъ фагъэуцугъ учреждением гъэхъагъэу ышIыгъэхэм джыри ахигъэхъонэу, Урысые Федерацием ишъолъырхэмкIэ анахь шIогъэ ин хэлъэу Iоф зышIэхэрэм АР-м и МФЦ зэращыщыри ­къыхигъэщыгъ.
Адыгэ Республикэм IофшIэнымрэ социальнэ хэхъоныгъэмрэкIэ и Министерствэ къызэрэщаIуагъэмкIэ, ЛIыхэсэ Рустам а Гупчэм Iофэу ыгъэцакIэрэм дэгъоу щыгъуаз, илъэсныкъом ехъоу пIэлъэ гъэнэфагъэкIэ пащэр дэмыс хъумэ, ащ ипшъэрылъхэр ыгъэцакIэщтыгъэх.