Зэрэхабзэу, еджапIэр къэ­зыухырэ ныбжьыкIэхэр апшъэрэ еджапIэхэм зэра­чIэхьащтхэм ыуж итых. Зы­хэм ар къадэхъу, зыхэм афэгъэхъурэп.

Ахэм афэдагъ Тэхъутэмыкъое гурыт еджапIэр къэзыухыгъэ кIэлакIэу игуетыныгъэрэ иакъылрэ яшIуагъэкIэ хэ­гъэгум икъэлэ шъхьаIэ дэт апшъэрэ еджапIэм чIэхьан зылъэкIыгъэр. Ар Еутых Рустам.
Тхылъхэр зыщитыщтхэ уахътэр къэб­лагъэщтыгъ, мэфэ заулэ нахь къэнэ­жьыгъагъэп, ау ежь къыхихыгъэ сэнэ­хьатымкIэ нахь къышъхьэпэщт предметэу физикэмкIэ къыхьыгъэ балл пчъагъэр джыри къаIожьыгъагъэп. Зыфаем ар чIэхьаным фэшI ащкIэ, анахь макIэмэ, балл 42-рэ къыхьын фэягъ. Зэфэхьысыжьхэр агъэгужъох. Чэщ реным мы­чъыеу Рустам ащ ежагъ, пчэдыжьым сыхьатыр 4-м ахэр къыхаутыгъэх, балл 45-рэ иIэу къычIэкIыгъ. Рустам куозэ иунэ къихъушъутыгъ, игупсэхэр зэкIэ къыгъэущыгъэх. ЗэкIэхэри гушIощтыгъэх, янэ гъыщтыгъ.
Рустам 2000-рэ илъэсым Тэхъутэ­мыкъуае, Еутых Тимуррэ Аминрэ яунагъо къихъухьагъ. Тэхъутэмыкъое гурыт еджапIэр къыухыгъ.
Ятэ, лIакъом инахьыжъхэм афэдэу, IэпэIас, автомобильхэр ешIыжьых. Янэ МФЦ-м специалистэу щэлажьэ. Зэшъхьэ­гъусэмэ шъэуитIурэ зы пшъашъэрэ зэ­дапIу. Рустам инеущырэ мафэ апэ ме­дицинэм рипхыщтыгъ, цIыфхэм Iэпы­Iэгъу афэхъуным кIэхъопсыщтыгъ, зы уахътэ горэми архитектор сэнэхьатым дихьыхыгъагъ, ау къыхихыгъэр фэ­шъхьаф. Ащ къыфэкIоным къыхэлэ­жьагъ ятэшэу Еутых Азмэтэу илъэс пчагъэ­хэм ошIэ-дэмышIэ IофхэмкIэ Министерст­вэм епхыгъэу къулыкъу зыхьыгъэр.
Ащ къыIуатэхэрэм, мэшIогъэкIосэ къулыкъум Iоф зэришIэрэм ядэIузэ, щынагъохэм апэшIуекIозэ, лIыгъэ къыз­хагъафэзэ Iоф зышIэхэрэм ащыщ хъунэу Рустам ыгу риубытагъ. Джащ тетэу 2018-рэ илъэсым ар кIуагъэ Урысыем ошIэ-дэмышIэ IофхэмкIэ и Министерствэ и Къэралыгъо мэшIогъэкIосэ къулыкъу и Академие чIэхьанэу.
А пчэдыжь дэдэм янэкIэ ятэжъэу Ожъубанэкъо Байзэт ипшъашъи икъо­рэлъфи рищажьэхи, имашинэкIэ Москва ыщагъэх. Рустам ащ фэдэ апшъэрэ еджэпIэшхом зычIахьэм, игупсэхэр зэ­рэгушIуагъэхэм гъунэ иIагъэп.
ИлъэситIум къыкIоцI курсантхэр казармэм чIэсыгъэх, къэралыгъом имылъкукIэ еджагъэх, псэугъэх. Я 3 — 4-рэ курсхэм Рустам фэтэрым исыгъ. ИлъэсиплI еджэгъур кIуагъэ. Краснэ площадым курсантмэ дипломхэр къащаратыжьыгъ.
Еджэныр къызеухым, Рустам Москва къыдэнэнэу, ащ Iоф щишIэнэу рихъу­хьагъ. Джы ар магистратурэм щеджэ, ащ дакIоу мэшIогъэкIосэ-къэгъэнэжьын къулыкъум щэлажьэ. Игухэлъ емыпцIы­жьэу, пшъэдэкIыжьэу Iофым хэлъыр зэхишIэу зэрэщытым ишIуагъэкIэ, Рустам псынкIэу иIофшIэгъухэм ахэзэгъагъ. Старшэ лейтенантэу Еутых Рустам Моск­ва икъыблэ шъолъыр ирайонэу Орехово-БорисовкIэ заджэхэрэм ия 7-рэ мэшIогъэкIосэ-къэгъэнэжьын къулыкъу икараул ипащэу Iоф ешIэ.
КъулыкъушIэм анахь макIэмэ килограмм 30 пышIагъэу къыздырехьакIы, ащ мэшIогъэкIосэ Iэмэ-псымэхэр хэмытхэу. КъэпIон хъумэ, а килограмм 50-м кIахьэу гурытымкIэ зэрахьэ. ЕтIани цIыфхэр машIом къыхащыжьыхэ зы­хъурэм, IэкIэ унэмэ къарахыжьхэуи мэхъу. Джащ пае пкъышъолыр фэдэ IофшIэным фэбгъэхьазырын фае. А лъэныкъом мэшIогъэкIуасэхэм лъэшэу анаIэ тырагъэты.
Рустам ащкIэ иIофхэр дэгъу. Апэрэ классым къыщегъэжьагъэу академием чIэхьэфэ ар урым-рим бэнакIэм пы­лъыгъ, итренерыгъэх Тэхъутэмыкъое ДЮСШ-м иIофышIэхэу Зэрамыку Руслъан, Джастэ Вячеслав ыкIи Заурим Тимур. А спорт лъэпкъым Рустам гъэ­хъагъэхэр щишIыгъ.
IофшIэныр зэрэгъэпсыгъэр — макъэ къазырагъэIурэм ыуж такъикъипшIым машIор къызщызэхэнэгъэ чIыпIэм щыIэнхэ фае.

БэмышIэу хъугъэ-шIэгъэ къин хэфагъэх. Ягъунэгъу къалэхэм ащыщ чIы­дагъэр къызщыдагъэкIыжьырэ базэу дэтыр мэшIошхом зэлъиштэгъагъ. Москва ишъолъыр зэфэшъхьафхэм ямэшIогъэ­кIуасэхэм къахахыгъагъэх машIом игъэ­кIосэнкIэ адэIэпыIэщтхэр.
— Москва и Къыблэ шъолъыркIэ сэ сызэрэкIощтыр сэр-сэрэу афэсIопщы­гъагъ. Къиныгъэ, ау тыфырикъугъ, — ыгу къэкIыжьы Рустам.
— МашIом зыкъиштэмэ, сабыйхэм янэ-ятэхэр чIанэхэу мэхъу, ащ фэдэхэм, гухэкIми, тыряшыхьат. Ны-тыхэр чIэунэнхэр тхьамыкIэгъошхоба? Амал зэриIэу шIушIэ Iофтхьабзэхэм тахэлажьэ, анахьэу ахэр сабыйхэм ыкIи сэкъатныгъэ зиIэхэм афэгъэхьыгъэ зыхъукIэ. КIэлэцIыкIу Унэм чIэсхэм заIудгъэкIэгъагъ. ШIэныгъэм и Мафэ тефэу ахэм адэжь тыкIуагъ, шIу­хьафтынхэр яттыгъэх, зэIукIэ адэтшIыгъ. Ащ ыуж футбол тызэдешIагъ — мэшIогъэкIосэ къулыкъум хэтхэмрэ кIэлэцIыкIу Унэм икомандэрэ. КIэлэцIыкIумэ дунаир афэхъужьыщтыгъэп, фэягъэхэп татIупщыжьынэу. Ащ фэдэ такъикъхэм уегупшысэ: сыдэу макIэ цIыкIухэр бгъэ­гушIонхэм ищыкIагъэр, — къыIотагъ Рустам.
Еутых Рустам Iоф зишIэрэр илъэсищ мэхъу къодый. Ау а уахътэм къыкIоцI гъэхъагъэхэр ышIынхэу игъо ифагъ.
Дэгъоу къулыкъу зэрихьырэм фэшI Урысые Федерацием и ЛIыхъужъэу, IэкIоцI къулыкъум иполковникэу Е. Н. Чернышовым ыцIэ зыхьырэ медалэу «Къэбгъэнэжьынхэм пае щыIэныгъ» зыфиIорэр къыфагъэшъошагъ, Москва и Къыблэ административнэ шъолъыр ипрефектурэ и Щытхъу тхылъ къыра­тыгъ.
КIэлакIэм зэрилъытэрэмкIэ, IофшIэнымкIэ иапэрэ гъэхъагъэхэр зыпкъ къи­кIыгъэхэр частым ипащэу, IэкIоцI къулыкъум истаршэ лейтенантэу Ла­зовскэ Андрей Андрей ыкъор ары.
— Уахътэ къыдафэмэ, къыздеджагъэу, сичIыпIэгъоу АкIэгъу Закир сыдэгущыIэ. Ащи Москва дэт апшъэрэ еджа­пIэр къыухыгъ, Кавказ щыщ ныбжьыкIэ пэрытхэм ащыщ. Адыгеим и ЛIыкIо IофшIапIэу Москва дэтым иныбжьыкIэ сообществэ хэтхэм сахэхьэ. ТизэIукIэхэр, хабзэ зэрэхъугъэу, адыгэ къашъохэмкIэ тэухыжьых. ГъэшIэгъоныр — цIыфыр Кавказ щыщ къодыемэ, ар уигупсэ мэхъу, уфекъудыи. Тикъуаджэ, ащ дэсхэм сафэзэщы. СиIофшIэн елъытыгъэу, илъэс­ныкъом зэ ащ сыкIон сэлъэкIы.
Ар къызыкIокIэ, зэкIэми ягушIогъошху. Янэ адыгэ шхыныгъохэр фи­гъэхьазырынхэм езэщырэп, ышыпхъоу Заирэрэ ышэу Казбекрэ ар атIупщырэп, къызщыкIогъэ уахътэм нахьыбэрэ зэригъусэщтхэм пылъых. Ятэ хабзэр нахь зэрехьэ, икъэбаркIэ къеупчIышъ, иIоф­шIэн педзэжьы.
— БэмышIэу сиеджэпIэ гупсэ сыщы­Iагъ. Сезыгъэджэгъэ кIэлэегъаджэхэм саIукIагъ. Я 6-рэ классым щеджэрэмэ зэIукIэгъу адысиIагъ. КъызэрэчIэкIы­гъэмкIэ, ахэм зэкIэ ашIэ ашIоигъу, сэнэхьатым фэгъэхьыгъэ упчIэу къатыгъэр бэ, зэдэгущыIэгъур гъэшIэгъонэу рекIокIыгъ, — икъэбар лъигъэкIотагъ Рустам.
— Рустамрэ сэрырэ зы класс тызэдисыгъ, — къыздэгуащэ игупшысэхэмкIэ АкIэгъу Закир. — Рустам пшъэ­дэкIыжьышхо хэлъ, джары ащ фэдэ сэнэхьат къызкIыхихыгъэр, а IофшIэным шIушIагъэ пылъ, ащ дакIоу щынагъоуи щыт. Урысыем и МЧС и Къэралыгъо мэшIогъэкIосэ къулыкъу и Академие ащ дэгъоу къыухыгъ, джы иIоф­шIэни щытхъу пылъэу егъэцакIэ. Ар сэ дэгъоу сэшIэ, сыда пIомэ ныбжьыкIэ организацием сырипэщагъ. Сыд фэдизэу Iофым епхыгъэми, ащ уахътэ къыхе­гъуатэ тиIофтхьабзэхэм къахэлэжьэнэу.
Сэ джырэ уахътэм УФ-м экономикэмкIэ и Министерствэ сыщэлажьэ. Джырэ­благъэ КъокIыпIэ Чыжьэмрэ Арктикэмрэ яIофхэмкIэ Министерствэм иинвести­ционнэ проектхэм зафэзгъэзэнэу щыт. Аспирантурэм сыщеджэ ыкIи лъэпкъ хъызмэтым и Академиеу Урысые Феде­рацием и Президент дэжь щыIэм щесэгъаджэх. Кавказ республикэхэм ыкIи Краснодар краим къарыкIыхэрэм еджэнымкIи IофшIэнымкIи сызэрадеIэщтым ренэу сыпылъ. Ау тыдэ тыщыIэми, Рус­тамрэ сэрырэ тилъэныкъо гупсэ зэпхыныгъэу дытиIэр чIэтынэщтэп, нахь зэ­рэдгъэпытэщтым тыпылъыщт.
АкIэгъу Разиет.
Тэхъутэмыкъуай.