Адыгеим и ЛIышъхьэу КъумпIыл Мурат урысые, дунэе зэнэкъокъухэм ащатекIогъэ, хагъэунэфыкIырэ чIыпIэхэр къащызыхьыгъэ тиспортсменхэм ыкIи ахэм ятренерхэм АР-м и Правительствэ зычIэт унэм щаIукIагъ.

Республикэм ипащэ текIоныгъэшхо­хэр къызэрэдахыгъэхэм фэшI спортсменхэм афэгушIуагъ, республикэм испорт хабзэхэр къэзыгъэгъунэрэ, чемпионыкIэхэр зыгъэсэрэ тренерхэм «тхьашъуегъэпсэу» ариIуагъ. ГъэрекIорэ мы илъэсымрэ тиспортсменхэм дунэе зэнэкъокъухэм дышъэ медали 4, тыжьыни 2, джэрзи 2, урысые зэнэкъокъухэм дышъэ 56-рэ, тыжьын 49-рэ, джэрз 71-рэ къащахьыгъ. ЗипсауныгъэкIэ щыкIагъэ зиIэ тиспорт­сменхэм ятекIоныгъэхэри ахэм ахэхьэх. Адыгеим испортсмен 70-р спорт ­лъэпкъ зэфэшъхьафхэмкIэ Урысыем ихэшыпыкIыгъэ купхэм ахэхьэх.
«Тигъэхъагъэхэм ахэхъонэу, спорт щыIакIэм игупчэу тиреспубликэ зэрэщытыр джыри къыгъэшъыпкъэжьынэу тыфай. Пшъэрылъ шъхьаIэр – респуб­ликэм ис нэбгырэ пэпчъ спортым пылъы­нэу, спортсменхэм тренировкэхэр ашIынэу амал ягъэгъотыгъэныр ары. Илъэси 7-кIэ узэкIэIэбэжьымэ, спорт псэолъэ 903-рэ Адыгеим итыгъэр. Джыдэдэм ахэм япчъагъэ 1047-м нэсыгъ. Республикэм щыпсэухэрэм япроцент 62-мэ спорт псэуалъэхэр къызфагъэфедэх. Адыгэ Республикэм исхэм азыныкъо нахьыбэр спортым пылъ, цIыфхэм щыIэкIэ-псэукIэ тэрэз яIэнымкIэ пэрытныгъэр зыIыгъ шъолъырхэм Адыгеир ахэхьэ. ТекIоныгъэшхохэр къызщыдахырэ спортым изегъэушъомб­гъун а пстэур фэIорышIэ. Адыгеим спортымкIэ амалышхохэр IэкIэлъых, IэпэIэсэныгъэшхо зыхэлъ спортсменыбэ, тренер дэгъухэр тиIэх. Ащ къикIырэр нахь текIоныгъэшхохэр тшIын зэрэтлъэ­кIыщтыр ары», — къыIуагъ Адыгеим и ЛIышъхьэ.
КъумпIыл Мурат зэрэхигъэунэфыкIыгъэмкIэ, гъэхъэгъэшхохэр зышIын зылъэкIыщт спортсменхэм ягъэхьазырынкIэ республикэм непэ Iофышхо щашIэ. Спортсменхэмрэ тренерхэмрэ IэпыIэгъоу аратырэми хэхъо. 2025-рэ илъэсым амалыкIэ агъэфедэу ­рагъэжьагъ: ыпэкIэ дунэе зэнэкъокъухэм медальхэр къазэращадахыгъэм пае спортсмен ныбжьыкIэхэм ахъщэ къаратыщтыгъэмэ, мы илъэсым игъэтхапэ къыщегъэжьагъэу урысые зэнэкъокъухэм щатекIохэрэми ахъщэ къараты хъугъэ.
ЗэIукIэм икIэух Адыгеим и ЛIышъхьэ джыри зэ спортсмен сэнаущхэмрэ ахэм ятренерхэмрэ спорт гъэхъэгъэшхохэр зэрашIыгъэхэм фэшI афэгушIуагъ, текIоныгъакIэхэр ашIынэу спортсменхэм афэлъэIуагъ, ахъщэ сертификатхэр аритыгъэх.
ШIухьафтынхэр афагъэшъошагъэх урым-рим бэнакIэмкIэ Урысыем ипервенствэ тыжьын медалыр къыщызыхьыгъэ Асэкъэлэ Тамерлан, урым-рим бэнакIэмкIэ Урысыем ипервенствэ джэрз медалыр къыщызыхьыгъэ Iэшъынэ Исмахьил, щэрыонымкIэ (дэеу зэхэзыхыхэрэм яспорткIэ) Урысыем ичемпионат джэрз медалыр къыщызыхьыгъэ Юлия Башмаковам, урым-рим бэнакIэмкIэ Урысыем ипервенствэ джэрз медалыр къыщызыхьыгъэ Барцо Рустам, боксымкIэ Урысыем ипервенствэ щатекIуагъэу Мушег Баяндурян, самбэмрэ дзюдомрэкIэ (дэеу зэхэзыхыхэрэм яспорткIэ) Урысыем ичемпионэу Беданэкъо Заур, атлетикэ онтэгъумкIэ Урысыем и Кубок икъыдэхынкIэ тыжьын медалыр къэзыхьыгъэу Бзэсэжъ Аслъан, самбэмкIэ Урысыем ичемпионат тыжьын медалыр къыщызыхьыгъэ Гъомлэшк Анзор, дзюдомкIэ Европэм и Кубок икъыдэхынкIэ джэрз медалыр къэзыхьыгъэ Датхъужъ Алый, дзюдомкIэ Европэм и Кубок икъыдэхынкIэ джэрз медалыр къэзыхьыгъэ Еутых Рэмэзан, самбэмрэ дзюдомрэкIэ (дэеу зэхэзыхыхэрэм яспорткIэ) Урысыем ичемпионкэу Инна Кибиткинам, боксымкIэ Урысыем ипервенствэ тыжьын медалыр къыщызыхьыгъэ София Максюта, дзюдомкIэ Европэм и Кубок щатекIогъэ Мерэм Дамир, самбэмкIэ дунаим и Кубок къыдэзыхыгъэ, Урысыем ичемпионэу Наш Расул, урым-рим бэнакIэмкIэ Урысыем ипервенствэ джэрз медалыр къыщызыхьыгъэ ШъэошIу Марат, самбэмкIэ дунаим и Кубок икъыдэхынкIэ тыжьын медалыр къэзыхьыгъэ Тау Адам. Урысыем самбэмкIэ дунэе класс зиIэ имастер иудос­товерение Наш Расул къыфагъэшъо­шагъ.
Джащ фэдэу ахъщэ шIухьафтынхэр къаратыгъэх спортсменхэм ятренерхэу Асэкъэлэ Бислъан, Беданэкъо Байзэт, Карлен Восканян, Георгий Гуляйченкэм, Делэкъо Адам, Джарымэкъо Рустам, Александр Ким, Сихъу Аслъан, Евгений Хабибулиным, ЦIэIугъошIу Азэмат.
Республикэм ипащэ шIухьафтынхэр заретыжь нэуж спортым илIыкIохэм зэдэгущыIэгъу адыриIагъ. Спортсменхэм медицинэ фэIо-фашIэхэр зэрафагъэцакIэхэрэм, пэIудзыгъэ псэупIэхэм спорт псэолъакIэхэр ащыгъэпсыгъэнхэ, яухьазырыныгъэкIэ ахъщэу къатIупщырэм хэгъэхъогъэн, зэнэкъокъухэм ахэлэжьэгъэн зэрэфаем ыкIи нэмыкIхэм ахэр атегущыIагъэх.
АР-м и ЛIышъхьэ
ипресс-къулыкъу
къытырэ къэбархэмкIэ
ЛIышэ Саныет.