УФ-м и Президентэу Владимир Путиным игукъэкIыкIэ агъэнэфэгъэ апэрэ Лъэпкъ шIухьафтынэу «Къэралыгъор цIыфхэм зэрахъокIы» зыфиIорэм илауреат нэбгырэ минмэ ащыщ хъугъэ фондэу «Хэгъэгум иухъумакIохэм» ишъолъыр къутамэ ипащэ игуадзэу Джарымэ Еленэ. «Адыгэ макъэр» ащ IукIагъ, игупшысэхэр къыригъэIотагъэх.

Iофтхьабзэр Москва иконцерт залэу «Зарядье» зыфиIорэм щыкIуагъ. Стратегическэ гукъэкIхэмкIэ Агентствэм Росконгресс фондыр игъусэу, ахэм Урысыем и Внешэкономбанк, УФ-м зыкъэухъумэжьынымкIэ и Министерствэ ыкIи къэралыгъо фондэу «Хэгъэгум иухъумакIохэр» зыфиIорэр яIэпыIэгъу­хэу мыр зэхащагъ. Предпринимательхэм, шIэныгъэлэжьхэм, проект ыкIи гукъэкI гъэшIэгъонхэр зиIэхэм, хэушъхьафыкIыгъэ дзэ операцием и ЛIыхъужъхэм, фондэу «Хэгъэгум иухъумакIохэр» зыфиIорэм илIыкIохэу ветеранхэм ыкIи ахэм яунагъохэм зынаIэ атезыгъэтыхэрэм шIухьафтыныр афагъэшъошагъ.
ХэушъхьафыкIыгъэ дзэ операцием хэлажьэхэрэм IэпыIэгъу афэхъугъэнымкIэ къэралыгъо фондэу «Хэгъэгум иухъу­макIохэр» зыфиIорэм итхьаматэ иупчIэжьэгъоу Алексей Пузыниным Еленэ Анатолий ыпхъум тын лъапIэр къыритыжьыгъ. Грант патриотическэ проектэу «ЛIыхъужъым исурэт» зыфиIорэм пае ар къыфагъэшъошагъ. 2024-рэ илъэсым а проектым ныбжьыкIэ дзэ-патриотическэ объединениеу «ЗыкIыныгъэр» кIэщакIо фэхъугъ. Ащ иIэпыIэгъух фондэу «Хэгъэгум иухъумакIохэм» ишъолъыр къутамэрэ Адыгэ республикэ общественнэ организациеу «ХэушъхьафыкIыгъэ дзэ операцием иветеранхэм я Ассоциациерэ». Iофтхьабзэм ипшъэрылъыр хэушъхьафыкIыгъэ дзэ операцием и ЛIыхъужъхэм, иветеранхэм яшIэжь гъэпытэгъэным имызакъоу, ахэм ацIэхэр ныбжьыкIэхэм арагъэшIэныр, къыткIэхъухьэрэ лIэужхэр ахэм ящысэхэмкIэ пIугъэнхэр ары.
— ТичIыгогъу лIыхъужъхэм яшIэжь къызэтедгъэнэн закъор арэп тыздэлажьэрэр. Псаоу къытхэтхэм ныбжьыкIэхэр аIудгъакIэхэзэ, ахэм ящысэхэмкIэ пIугъэнхэр, лIэужхэм язэпхыныгъэ лъыгъэкIотэгъэныр, лIыгъэу зэрахьагъэр ащытымыгъэгъупшэныр типшъэрылъ, — хигъэунэфыкIыгъ Джарымэ Еленэ.
Ар общественнэ IофышIэу зэрэщытым дакIоу, ишъхьэгъуси икIали Iэшэ зэIуупIэныгъэхэм яветераных. Ишъхьэгъусэ джыдэдэм идзэ пшъэрылъхэр Курскэ хэкум щегъэцакIэх. Арышъ, мы проектым Еленэ мэхьанэ реты ыкIи куоу зэхешIэ. ШIухьафтыныр тын лъэпIэ закъоу ылъы­тэрэп, фондым ыкIи ащ щылажьэхэрэм яIофшIэн Урысыем икъэкIощт зэрагъэпытэрэм ар ишыхьат.
Стратегическэ гукъэкIхэмкIэ Агентствэм зэрилъытагъэмкIэ, шIухьафтыным илауреат хъугъэ цIыфхэм ягъэхъагъэ­хэмкIэ ыкIи къадэлажьэхэрэм яIоф­шIэнкIэ къэралыгъор ыпэкIэ лъыкIотэным яIахьышIу халъхьагъ. Ахэм ягукъэкIхэм гу зэралъатагъэм имызакъоу, къэралыгъом ипащэ иунашъохэм къащыдыхалъы­тэх.
Iэшъынэ Сусан.