Урысые гъэсэныгъэ-зекIо программэу «Университетские смены» зыфиIорэм иапэрэ чэзыу Мыекъопэ къэралыгъо технологическэ университетым щаублагъ. Урысые Федерацием и Президент иунашъокIэ УФ-м шIэныгъэмрэ апшъэрэ гъэсэныгъэмрэкIэ и Министерствэрэ Урысые общественнэ-къэралыгъо движениеу «Апэрэхэм ядвижениерэ» ар зэхащэ.

Донецкэ Народнэ Республикэм къикIыгъэ кIэлэеджэкIо 24-рэ мы мафэхэм Адыгеим щыIэх. Апэрэ IофшIэгъу чэзыур бэдзэогъум и 17-м аублагъ. Илъэс 14-м къыщегъэжьагъэу 17-м нэс зыныбжьыхэр ары ащ хэлажьэхэрэр.
Мэфи 10-м ныбжьыкIэхэм гъэсэныгъэ, культурнэ, патриотическэ Iофтхьэбзэ зэфэшъхьафхэр афызэхащэщтых. ЯшIэныгъэхэм зэрахагъахъорэм дакIоу загъэпсэфын амал яIэщт ыкIи зекIо кIощтых. Адыгеим, адыгэ шэн-хабзэхэм нэIуасэ афэхъущтых.
ЗэкIэмкIи IофшIэгъу чэзыуитIу Мые­къопэ къэралыгъо технологическэ университетым щызэхащэщт. Нэбгырэ 48-рэ ащ къекIолIэнэу агъэнафэ. Ахэр Урысые Федерацием ишъолъырыкIэхэм, Белгородскэ, Курскэ ыкIи Брянскэ хэкухэм къарыкIыщтых. ЫпэрапшIэу хэушъхьафыкIыгъэ дзэ операцием щыIэхэм якIэлэцIыкIухэр, «Апэрэхэм ядвижение» зэхищэгъэ къыхэхыным пхырыкIыгъэхэр ары къекIолIагъэхэр.
Апэрэ IофшIэгъу чэзыур мы мафэхэм мэфэкI шIыкIэм тетэу къызэIуахыгъ. Донецкэ Народнэ Республикэм икъалэу Горловкэ ыкIи къалэу Иловайск къарыкIыгъэхэр ары къэкIуагъэхэр.
— «Университетские смены» зыфиIорэм ишIуагъэкIэ чыжьэу къикIырэ кIэлэеджакIохэр шъолъырым итарихъ нэIуасэ фэхъух. Университетым иIофшIэн янэрылъэгъу, студент щыIакIэр зыфэдэр аушэты. Апшъэрэ еджапIэм сэнэхьатэу зыщыфырагъаджэхэрэм ащагъэгъуазэх, — къыIуагъ АР-м гъэсэныгъэмрэ шIэныгъэмрэкIэ иминистрэу Евгений Лебедевым.
Бэдзэогъум и 26-м нэс апэрэ чэзыум Iоф ышIэщт, ятIонэрэр бэдзэогъум и 27-м къыщегъэжьагъэу шышъхьэIум и 5-м нэс щыIэщт.