Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэлэжьэщтхэм яхэшыпыкIын едзыгъо ыкIэм фэкIуагъ. Анахь шIэныгъэ дэгъу къэзыгъэлъэгъогъэ нэбгырэ 38-рэ къыхахыгъ.

Ахэм ащыщэу 18-мэ еджэныр очнэу рагъэжьэщт, 20-р резервым хэтыщтых. Программэм текIоныгъэ къыщыдэзыхыгъэхэм ащыщхэм «Адыгэ макъэр» гущыIэгъу афэхъугъ.
Шъугу къэдгъэкIыжьын, УФ-м и Президентэу Владимир Путиным къахилъхьэгъэ федеральнэ программэу «ЛIыхъужъхэм яуахът» зыфиIоу гъэрекIо щегъэжьагъэу агъэцакIэрэм имэхьанэ зыкъызэриIэтырэм епхыгъэу къэралыгъом ипащэ пшъэрылъ къыгъэуцугъ шъолъырхэри ащ фэдэ проектым игъэцэкIэн фежьэнхэу. Ащ къыдыхэлъытагъэу, АР-м и ЛIышъхьэу КъумпIыл Мурат иунашъокIэ шъолъыр программэу ­«Адыгеим и ЛIыхъужъхэр» зыфиIорэм ипхырыщын фежьагъэх.
— Зидзэ пшъэрылъхэр щытхъу хэ­лъэу зыгъэцэкIагъэхэм ыкIи джыри зыгъэцакIэхэрэм тапэкIи Адыгейми, Урысыеми ямамыр щыIакIэ яIахь зэрэхалъхьащтым сицыхьэ телъ, — къыIуагъ АР-м и ЛIышъхьэу КъумпIыл Мурат.
Урысыем иуголовнэ-гъэцэкIэкIо къулыкъу и ГъэIорышIапIэу АР-м щыIэм иIофышIэу, хэгъэгу кIоцI къулыкъум имайорэу Сергей Старусь программэм хэлажьэ, еджэныр шышъхьэIум и 25-м езыгъэжьэщтхэм ар ахэт. Программэм иедзыгъохэм Сергей шIэныгъэ куу къа­щигъэлъэгъуагъ. Михайловскэ артил­лерийскэ академиер ащ къыухыгъ, дзэкъулыкъушIэу щэрыокIо подразделениехэм команднэ IэнатIэхэр ащигъэцэкIагъэх.

2022-рэ илъэсым хэушъхьафыкIыгъэ дзэ операциер зыщырагъэжьэгъэ апэрэ мэзитфым Херсон лъэныкъом щыIагъ. УФ-м и Президентэу Владимир Путиным иунашъокIэ идзэ пшъэрылъхэр ыгъэцакIэхэзэ, лIыхъужъныгъэу зэрихьагъэхэм афэшI бгъэхалъхьэу «За отвагу» къыфагъэшъошагъ. Мы гъэхъагъэр ежь ышъхьэ изакъоу филъэгъужьырэп, зипэщэгъэ подразделением хэтыгъэхэм яшIушIагъэу елъытэ. Сергей къызэрэхигъэщыгъэмкIэ, дзэ пшъэрылъэу а лъэхъа­ным зэшIуахыгъэм ихьатыркIэ тидзэхэр ыпэкIэ лъыкIотагъэх, лъэсыдзэ командирхэр къазэрафэразэхэр къакIохэзэ къараIуагъ. Сергей мы уахътэм уголовнэ-гъэцэкIэкIо къулыкъум Iоф щешIэ.
— Зэнэкъокъу шIыкIэм тетэу программэм упхырыкIыныр псынкIагъоу щытыгъэп. ЗэкIэ едзыгъохэр гъэшIэгъо­ныгъэх. Къыхэзгъэщымэ сшIоигъу дзэкъу­лыкъушIэхэм яшIэныгъэхэр, якъулайныгъэ, акIуачIэ зыфэдэхэр аушэтынымкIэ, къагъэлъэгъонымкIэ мы программэр амалышIу зэрэхъугъэр. Сигуапэ сызэрэпхырыкIыгъэр, тиреспубликэ хэхъоныгъэ ышIыным сиIахьышIу хаслъхьэ, ащ щыпсэухэрэм сишIуагъэ язгъэкIы сшIоигъуагъ, — къыIуагъ Сергей Старусь.
Тикъэралыгъо ищынэгъончъагъэ къэ­ухъумэгъэным ыпсэ емыблэжьэу хэ­лжьагъэхэм ащыщ Братэ Мурат. ХэушъхьафыкIыгъэ дзэ операциер зырагъэжьэгъэ лъэхъаным тигущыIэгъу ОМОН-м хэтыгъ. Ащ зэрилъытэрэмкIэ, дзэкъулыкъушIэр сыдигъуи ихэгъэгу къыухъумэным фэхьазырынэу щыт ыкIи ар къыгъэшъыпкъэжьызэ, апэу зэуапIэм Iухьагъэхэм ахэтыгъ, лIыхъужъныгъэу зэрихьагъэм фэшI медалэу «За отвагу» зыфиIорэр къыфагъэшъошагъ.
— «Зэо зэпэуцужьхэм яветеран» зыфиIорэ цIэр зысиIагъэр бэшIагъэ — дзэ операцием ыпэкIи зэо зэфэшъхьафхэм сахэтыгъ. Чэчэным, Дагъыстан, Ингушетием ащыкIогъэ зэпэуцужьхэм сахэлэжьагъ. Ащ къыхэкIэу IэпэIэсэныгъэ икъу сIэкIэлъэу хэушъхьафыкIыгъэ дзэ операцием ОМОН-м иотряд сыхэтэу сыкIуагъ. А лъэбэкъум сырэгушхо, сырыкIэгъожьырэп, — еIо Мурат.
ГухэкI нахь мышIэми, дзэкъулыкъушIэр бэрэ дзэ операцием хэтынэу хъугъэп. Зыхэтыгъэ отрядыр щэрыоным хиубыти, ынэ ыкIи ышъхьэ дыхэтэу уIэгъэ хьы­лъэу къытыращагъэм къыхэкIыкIэ тIысыжьын фаеу хъугъэ. Я 2-рэ купым хэхьэрэ зиIэ сэкъатныгъэ къыратыгъ. КIэлэ ныбжьыкIэм охътабэ госпитальхэм ащихьыгъ, къиныгъуабэмэ апхырыкIыгъ, ау ыIэхэр риушхохыгъэп. Дзэ ар хэтыжьынэу мыхъурэми, джы ар шъхьафит бэнэнымкIэ Мыекъуапэ иеджапIэ тренерэу щэлажьэ. Ащ дакIоу дзэ операцием иветеранхэм апае зэхащэрэ Iоф­тхьабзэхэм чанэу ахэлажьэ. УФ-м и Президентэу Владимир Путиныр зикIэщэкIо федеральнэ программэу «ЛIыхъужъ­хэм яуахът» зыфиIорэми икIыгъэ илъэсым ар хэлэжьагъ, сертификати къыратыжьыгъ. Джы республикэ программэу «Адыгеим и ЛIыхъужъхэр» зыфиIорэми зыщиушэтыгъ ыкIи пхырыкIыгъ.
— ЛIыхъужъэу зыкъэзгъэлъэгъонэу е IэнэтIэшхо сыщыгугъэу арэп зэнэкъо­къум сызкIыхэлэжьагъэр. ШIэныгъэу, IэпэIэсэныгъэу спортымкIэ сиIэр згъэфедэн, ащ иIофыгъохэр пхырызгъэкIынхэм пай. Анахь шъхьаIэр кIэлэцIыкIухэр ары, ахэр спортым дэгъоу фэдгъасэхэмэ, тишъо­лъыр шъхьадэкIэу зэнэкъокъухэм захэлажьэхэкIэ, Адыгеим ищытхъу арагъэ­Iощт. Непэ Адыгеим и ЛIышъхьэу ­КъумпIыл Мурат а Iофым лъэшэу ынаIэ тет, тэри, дзэкъулыкъушIэхэм, ащ тыгоуцон, дедгъэштэн гухэлъ тиI, — хигъэ­унэфыкIыгъ Братэ Мурат.
ТигущыIэгъухэм афэдэу Хэгъэгум ыпашъхьэ гъэхъэгъабэ щызиIэ цIыфэу тиIэр макIэп, ахэм тарэгушхо. Республикэм хэхъоныгъэ ышIынымкIэ нэбгырэ пэпчъ ишIуагъэ къызэригъэкIощтым тицыхьэ телъ.
Iэшъынэ Сусан.