Iоныгъор ыкIэм фэкIо
Охътэ кIэкIым, мэфэ ошIухэр къызфагъэфедэхэзэ, республикэм ичIыгулэжьхэм Iоныгъор зэшIуахы. ЗэкIэмкIи гектар мин 107621-рэ ахэм аIожьынэу щытыр, бэдзэогъум и 21-м ехъулIэу гектар 81580-рэ Iуахыжьыгъ.
ГурытымкIэ бжыхьэсэ гектарым центнер 58,4-рэ къырахи, зэкIэмкIи тонн 418347-рэ къахьыжьыгъ.
АР-м мэкъу-мэщымкIэ и Министерствэ къызэритырэмкIэ, хьэ гектар 8380-м зэкIэмкIи тонн 42758-рэ къытыгъ, гурытымкIэ зы гектарым центнер 51-рэ къырахыгъ, гъэрекIорэм елъытыгъэмэ, ар центнер 3,9-кIэ нахьыб. Рапс гектар 10433-м щыщэу 9930-р Iуахыжьыгъ, центнер 27280-рэ къахьыжьыгъ. Зы гектарым центнер 27,5-рэ къытыгъ, гъэрекIорэм елъытыгъэмэ, центнери 8,1-кIэ нахьыб.
Бжыхьэсэ коцым иIухыжьыни ыкIэм фэкIо. Гектар 88626-м щыщэу 63147-рэ хагъэкIыгъ. Зы гектарым, гурытымкIэ лъытагъэу, центнер 59,4-рэ къырахыжьы. ЗэкIэмкIи тонн 374985-рэ къаугъо-
ижьыгъ.
Джэджэ районым бжыхьэсэ гектар 31922-у яIагъэм ипроцент 83-рэ аIожьыгъах. Коцэу мы районым щапхъыгъагъэр гектар 24519-рэ хъущтыгъ, 19254-р хагъэкIыгъ. Зы гектарым гурытымкIэ центнер 63,7-рэ къеты. РеспубликэмкIэ мы мафэм ехъулIэу апэрэ чIыпIэр мы районым ыIыгъ. Ащ ыуж ит Кощхьэблэ районыр, коц гектар пэпчъ гурытымкIэ центнер 60,1-рэ къыщырахы.
Мы мафэм ехъулIэу Кощхьэблэ, Красногвардейскэ, Шэуджэн районхэм ыкIи Мыекъуапэ бжыхьасэхэм япроцент 77-р Iуахыжьыгъ.
ЗэкIэмкIи комбайнэ 391-мэ лэжьыгъэр Iуахыжьы. Ахэм лэжьыгъэр зытырахыгъэ пстэумкIи гектар 49939-мэ уарзэр ащаупкIэтэжьыгъах, ар зыхажъухьажьыгъэр гектар 28776-р ары.
Гъатхэм апхъыгъагъэхэм яIухыжьын езыгъэжьагъэхэри чIыгулэжьхэм ахэтых. ГущыIэм пае, Кощхьэблэ районым гъэтхэсэ хьэ гектари 177-у щыхалъхьэгъагъэм щыщэу 121-р Iуахыжьыгъ, зы гектарым центнер 44,4-рэ къырахыгъ. Зэнтхъ гектар 196,4-у яIэм щыщэуи 30-р аIожьыгъах, гурытымкIэ лъытагъэу, центнер 36-рэ къеты. Джащ фэдэу мы районым джэнч лъэпкъэу щыхалъхьэгъагъэхэм, хэтэрыкIхэм яIухыжьыни щырагъэжьагъ.
Джэнч лъэпкъхэм яIухыжьын Джэджэ районми ыкIэм щыфэкIо. ПстэумкIи гектар 1507,3-у яIагъэм щыщэу 1407-р хагъэкIыгъ, центнер 36,2-рэ зы гектарым къырахы.
Республикэм хэтэрыкI гектар 169-у щашIагъэм щыщэу 27-р аугъоижьыгъ, картоф гектар 59-м щыщэу 12-р хахыжьыгъ.
ДЕЛЭКЪО Анет.