Адыгеим щыпсэухэрэмкIэ мэфэкI шъыпкъэ хъугъэ республикэ шы­къэгъэчъапIэм щыкIогъэ шыгъа­чъэхэр. Шы спортымкIи ар хъу­гъэ-шIэгъэ гъэшIэгъоныгъ.

Шыгъачъэхэр 7-у зэтеутыгъагъэх, зэкIэмкIи шIухьафтынэу ахэм арылъыгъэр сомэ миллионрэ мин 200-рэ хъущтыгъ. Анахь гъэшIэгъоныгъ ящэнэрэ къызэпэчъэгъур. Ащ шIухьафтынэу илъыгъ сомэ мин 500.
ШIухьафтын шъхьаIэм — «Большой приз Дерби Республики Адыгея» зыфаIуагъэм — зыныбжь илъэсищ хъугъэхэу ыкIи нахьыжъхэу ши 7 фэбэнагъ. Ахэр инджылыз къэ­гъэчъэш лъэпкъыгъэх. Гъогууанэр — метрэ 2400-рэ. ТекIоныгъэр къыдихыгъ Дзыбэ Джэнэт ишэу Фарз. Шыкъэгъачъэу Мурбек Мамуровым ыгъэIорышIэщтыгъэ Фарз гъогууанэр такъикъи 2-рэ нэгъэупIэпIэгъу 35,3-кIэ къычъыгъ.
ЯтIонэрэу къэсыжьыгъ Щыгъущэ Айдэмыр зытесыгъэ Лавли Бой. Ар нэгъэупIэпIэгъуи 2-кIэ ыуж къинагъ Фарз. Ящэнэрэ хъугъэ Гиппократэу Джубей Адвидзбэ ыгъэ­IорышIэщтыгъэр.
Мыхэм анэмыкIэу зэпэчъэн зэфэшъхьаф­хэм текIоныгъэ къащыдэзыхыгъэхэм къа­хэбгъэщынхэ фае къэгъэчъэшыхэу Профи Джет, Филиал, Реал Чарм, Рэдэд, Апсара, Графиня зыцIэхэр. Мыхэм шIухьафтын хэ­хыгъэхэр къахьыгъ.

Шыгъачъэхэм ямызакъоу, мэфэкIым къе­кIолIагъэхэм апае культурнэ программи агъэхьазырыгъагъ, шхэпIэ зэфэшъхьафхэу лъэпкъ шхыныгъохэр къезыщэлIагъэхэми ащ Iоф щашIагъ. Шы спортым имэфэкI хъугъэ Iофтхьабзэр. Шым идэхагъэ изакъоп ащ къыщагъэлъэгъуагъэр, шъолъырым шыхъуным зыщегъэушъомбгъугъэн зэрэфаем, ащ мэхьанэшхо зэриIэм къыкIагъэтхъыгъ зэхэщакIохэми, ащ хэлэжьагъэхэми. Джащ фэдэу ныбжьыкIэхэр а спорт лъэпкъым фэщэгъэнхэм, Урысыем ишъолъырхэм язэпхыныгъэ гъэпытэгъэнми яамалышIоу ар хъугъэ. Зэ­хэщакIохэм къызэрэхагъэщыгъэмкIэ, лъэпкъым игушъхьэлэжьыгъэ бай изы Iахьэу щыт шы спортыр ыкIи зекIоным Адыгеим зыщиушъомбгъунымкIи ишIуагъэ къэкIощт.