Шъузэрэщыдгъэгъозэгъагъэу, футбол клубэу «Зэкъошныгъэм» бэ­дзэогъум и 20-м республикэ ста­дионым зэIухыгъэ тренировкэхэр щыриIагъэх.

Мыщ фэдэ IофшIакIэм командэмрэ ащ лъыплъэхэрэмрэ нахь зэпэблагъэ ешIых, ар агу рехьы лъэныкъуитIуми.
Iофтхьабзэр аублагъ «Зэкъошныгъэм» итренировкэхэу зы сыхьатрэ кIуагъэхэмкIэ. Нэужым футболистхэр, тренерхэр, клубым ипащэхэр къекIолIагъэхэм аIукIагъэх, зыгъэ­гумэкIырэ Iофыгъохэм атегущыIагъэх, еплъыкIэхэмкIэ зэдэгощагъэх. Анахь анаIэ зытырадзагъэр командэмрэ ар зикIасэу игъэхъагъэхэм алъыплъэхэрэмрэ нахь зэпэблагъэ хъунхэм иамалхэр ары. «Зэкъошныгъэм» игенеральнэ пащэу Андрей Ушениным къыIотагъ футбол клубым хэхъоныгъэу ышIыхэрэр, мурадэу яIэхэр. Тренер шъхьаIэу Сергей Мирошниченкэри, командэм икапитанэу Делэкъо Аскэри Iофтхьабзэм къекIолIагъэхэм гущыIэгъу афэхъугъэх.

Футбол командэу «Зэкъошныгъэр» зикIасэхэм къыхагъэщыгъ стадионым цIыфхэр нахьыбэу къещэлIэжьыгъэнхэ, ахэм япчъагъэ нэбгырэ мини 2 — 3-м нэгъэсыгъэным фэбэнэнхэ зэрэфаер, зэIукIэгъу къэс футболист пэпчъ ыкIуачIэ, иамал къащигъэ­лъэгъонхэм зэрэщыгугъыхэрэр.
Iофтхьабзэм икIэухым футболистхэмрэ ахэр зыIукIагъэхэмрэ сурэтхэр зытырарагъэхыгъэх.