АР-м и Сурэт къэгъэлъэгъуапIэ «Адыгэхэм ящыIэкIэ-псэукIэ тхыпхъэм чIыпIэу щиубытырэр» зыфиIорэ мас­тер-класс къыщитыгъ зэлъашIэрэ сурэтышIэу Бырсыр Абдулахь.

Адыгэ тхыпхъэм нэшэнэ шъхьа­Iэу иIэхэм, ар шъуашэм, унэгъо хъызмэтым щагъэфедэрэ пкъыгъохэм, пIуаблэхэм зэрахашIыхьэщтыгъэхэм Адыгеим инароднэ сурэтышI игъэкIотыгъэу къатегущыIагъ.
— Непэ темэ шъхьаIэу тхып­хъэр къызкIыхэсхыгъэр ар зыми фэмыдэу, къыкIэмыIотыкIыжьышъунэу зэрэщытыр ары. Мыщ ылъапсэр — лъэпкъым идунэееплъыкIэрэ икультурэрэ къизыIотыкIырэ псэушъхьэхэр ыкIи къэкIыхэрэр ары, — къы­хи­гъэщыгъ Бырсыр Абдулахь.
Iофтхьабзэм хэлэжьэнэу къе­кIолIагъэхэм ащыщ сурэтшIыныр зикIэсэ пшъэшъэ ныбжьыкIэу Анастасия Чудановар.
— Сэ искусствэхэмкIэ институтым сыщеджэ, я 4-рэ курсым сихьагъ. СурэтшIыныр сыгукIэ къыспэблагъ ыкIи ащ къешIэкIыгъэу зэкIэ зэхащэхэрэм сахэлажьэ. Мастер-класс зэрэщыIэщтыр зызэхэсэхым, сигуапэу сыкъеблэгъагъ ыкIи сыкIэгъо­жьырэп. СымышIагъэу мыщ щы­зэхэсхыгъэр макIэп, сшIо­гъэшIэгъон дэдэу седэIугъ хъурышъо паIом мэхьанэу адыгэ­хэм ратыщтыгъэм, ар зыха­шIыкIыщтыгъэм. Сэ сизакъоп, сяни къыздэсщагъ, — къыIуагъ Анастасие.
СурэтышIым гъэшIэгъонэу, узIэпищэу тхыпхъэм фэгъэхьыгъэ къэбархэр къэзэрэугъои­гъэхэм алъигъэIэсыгъ, ахэм ятеплъэ видеокъэгъэлъэгъонкIэ нэрылъэгъу афишIыгъ.
Iэшъынэ Сусан.