Сэнаущыгъэ ин зыхэлъ ныбжьыкIэхэр илъэс къэс Урысые кIэлэцIыкIу зы­гъэпсэфыпIэ гупчэ зэфэшъхьафхэм ащэIэх.

АдыгеимкIэ мы илъэсым зы­ныбжь имыкъугъэ нэбгыри 188-мэ «Орленкэм», «Артекым» ыкIи «Сме­нэм» защагъэпсэфынэу путевкэхэр аратыгъэх.
Ахэр еджэнымкIэ, спортымкIэ, творчествэмкIэ гъэхъагъэхэр зиIэ кIэлэцIыкIух. Джащ фэдэу об­щественнэ щыIакIэм чанэу хэлажьэхэрэри ахэм агъакIох. Мы гъэмафэм джащ фэдэу хэушъхьафыкIыгъэ дзэ операцием хэла­жьэхэрэм, е иветеранхэм ясабый нэбгыри 10 «Орленкэм» кIощт. Ахэм анэмыкIэу нэбгырэ 1700-рэ фэдиз мы илъэсым Жьыубгъу дэт лагерэу «Морская волна» зыфиIорэм ыкIи псэупIэу Сукко щагъэпсыгъэ «Электроным» заща­гъэпсэфын алъэкIыщт.
АдыгеимкIэ, хабзэ зэрэхъугъэу, «Горная легенда» ыкIи «Лань» зыфиIохэрэм кIэлэцIыкIухэм защагъэпсэфы, япсауныгъэ щагъэпытэ. Республикэм щыщ нэбгырэ миным ехъу мыхэм якIолIэщт, джащ фэдэу, хэбзэшIу хъугъэу, Херсон шъолъы­рым и Геническэ район къикIырэ кIэлэцIыкIухэри къэкIох. Мыгъэ нэбгырэ 600 фэдиз ахэм ащыIэщт. Илъэс къэс мафэрэ Iоф зышIэрэ лагерьхэр гъэсэныгъэ учрежде­ниехэм мэкъуогъу мазэм къащызэIуахых. Мы илъэсым 92-мэ Iоф ашIагъ, нэбгырэ мини 5,7-мэ ахэм защагъэпсэфыгъ.
— ШIуагъэ пылъэу, щынэгъончъэу загъэпсэфыныр ыкIи япсауны­гъэ псыхьагъэ хъуныр ары ыпэ­рап­шIэу тынаIэ зытедгъэтырэр. Лагерь пэпчъ программэ гъэшIэгъон иI. КIэлэцIыкIухэм апае зекIо зэфэшъхьафхэр зэхащэх, чIыопсым идэхагъэ арагъэлъэгъу, музейхэм, театрэхэм ащэх, археологием ылъэ­ныкъуи мэхьанэшхо раты. КIэлэцIыкIухэм языгъэпсэфыгъо лъэхъан гъэшIэгъонэу, шIуагъэ пылъэу кIоным, шIэныгъакIэхэр агъотынхэм ыкIи агъэкIогъэ уахътэр шIукIэ агу къинэжьыным пае къыттефэрэр зэкIэ тэгъэцакIэ, — къыIуагъ АР-м и ЛIышъхьэу КъумпIыл Мурат.