Гъэмэфэ мазэхэр анахь узыгъэгумэкIын Iофы­гъохэм ащыщ псым епхыгъэхэр. Гукъау нахь мышIэми, щынэгъончъэным ишапхъэхэр зэрамыгъэцакIэхэрэм къы­хэкIэу, илъэс пэпчъ ти­къэралыгъо ит псы­хъохэм ыкIи псыубытыпIэхэм нэбгырэ мини 3 фэдиз ащетхьалIэ, ахэм ащыщэу 300-р — кIэлэцIыкIух.

Мы илъэсым тэ тишъолъыри тхьамыкIагъо къызщыхъугъэхэм ахэфагъ. НэбгыриплIэу псым екIодылIагъэхэм ащыщэу тIур — кIэлэцIыкIугъэх.
Гъэтхапэм и 28-м Краснодар псыубытыпIэм къуашъом исхэу техьэгъэхэ ятэрэ ыпхъу цIыкIурэ къытекIыжьынхэ алъэкIыгъэп. Псы чэрэгъум ахэр хэфагъэх ыкIи ащ ыпкъ къикIэу къуа-
шъор зэпырызагъ, нэбгыритIури ытхьэлагъэх.
Мэлылъфэгъум и 20-м Мые­къопэ районым игъэпсэфыпIэ чIыпIэ речъэкIырэ псыхъом инэпкъ Iутыгъэ шъэожъыеу илъэс 11 зыныбжьыр цIэнлъагъэ ыкIи лъэш дэдэу чъэрэ псым хафи, агъотыжьыгъэп.
Шапхъэхэм адимыштэрэ чIыпIэхэм защыбгъэпскIы хъущтэп. Псы чIэгъым шъобж хьылъэхэр къыптезыщэн пкъыгъохэр чIэлъынхэ ылъэкIыщт.
ТхьамыкIагъохэм япчъагъэ нахь макIэ шIыгъэным пае Урысыем ошIэ-дэмышIэ Iоф­хэмкIэ и Министерствэ АР-мкIэ и ГъэIорышIапIэ иIофышIэхэм гъэмафэм кIэлэцIыкIухэм ящы­нэгъончъа-
гъэ епхыгъэ Iофы­гъуабэ зэ­шIуахы.
БэмышIэу ГъэIорышIапIэм илIыкIохэр Мыекъопэ ыкIи Тэ­хъутэмыкъое районхэм ащы­Iагъэх. Пшъэрылъ шъхьаIэу ахэм яIагъэр зызщагъэпскIырэ чIыпIэхэм якъыхэгъэщын ыкIи яуплъэкIун ары.
Мафэхэу пэшIорыгъэшъ уплъэ­кIунхэр зыщыкIуагъэхэм псы Iушъохэм защагъэпсэфыщтыгъ ны-тыхэми кIэлэцIыкIу­хэми. Псым узэрэщызекIон фэе шапхъэхэр агу къагъэкIыжьы­гъэх, анаIэ атырарагъэдзагъ ащ фытемыгъэпсыхьэгъэ чIыпIэхэм защыбгъэпсэфыныр зэрэщы­нагъом. Джащ фэдэу хэушъхьафыкIыгъэ гукъэкIыжь тхылъ цIыкIухэр зэкIэми аратыгъэх.
Ны-тыхэр ешъуагъэхэу сабыйхэр псым ащэхэмэ, ащ кIэух тхьамыкIагъо иIэн ылъэкIыщт. Джащ фэдэу кIэлэцIыкIухэр уигъусэу псы Iушъом ешъон Iофхэм уащыхахьэ хъущтэп, ащ ыпкъ къикIэу сакъыныгъэр пIэкIэзы, нэгъэупIэпIэгъум тхьамыкIагъор къэсы.
Зыщышъумыгъэгъупш: псыр щынэгъончъэныр бэкIэ шъо къышъолъытыгъ.
Гъомлэшк Байзэт.