Проектэу «Тиехэр гу итынэхэрэп» зыфиIорэм къыдыхэ­лъытагъэу, къэралыгъо фондэу «Хэгъэгум иухъумакIохэм» ишъолъыр къутамэ ынаIэ зытет нэбгыритф ыкIи яунагъохэр мэшIокугъогу зекIо гъогууанэу «В Карелию» зыфиIорэм техьагъэх.

Социальнэ-патриотическэ мэхьанэ зиIэ проектыр компаниеу «РЖД Тур» зыфиIорэр ыкIи Урысыем зыкъэухъумэжьынымкIэ и Министерствэ иIэпыIэгъу­хэу фондым пхырещы.
ЗэрагъэнэфагъэмкIэ, 2025-рэ илъэсым джыри зекIо гъогуонэ заулэ зэхащэщт. Ахэр: «Города Великой Победы», «По Золотому кольцу», «В Карелию», «Малахит», «Волжский вояж» ыкIи «Зимняя сказка».
ЗекIохэм культурнэ программэ бай, чIыопс дахэхэр къяжэ ыкIи чIыпIэ хэхыгъэхэу Карелием итхэр къарагъэплъы­хьащтых.
Апэрэ мафэм Москва зыщаплъы­хьащт, пчыхьэм Ленинград вокзалым мэшIокум зыщитIысхьэхэкIэ, зекIохэм анимациехэр къафагъэлъагъохэзэ, Петрозаводскэ кIощтых.
ЯтIонэрэ мафэм — Кижи ыкIи Петрозаводск. Пчэдыжьым жьэу мэшIокур Петрозаводскэ нэсы. ЗекIозещэхэм ахэр заIукIэхэкIэ, теплоходым рагъэтIысхьанхэшъ, хыкъумэу Кижи ащэщтых. Щагум щызэIухыгъэ музей-заповедникыр къарагъэплъыхьащт. Нэужым Петрозаводскэ къыщыращэкIыщтых, музыкальнэ программэ къафатыщт. Пчыхьэм Сортавала нэсыщтых.
Ящэнэрэ мафэм — Сортавала, Рускельскэ псыкъефэххэр, къушъхьэ паркэу Рускеала. Сортавалэ зыкъызыщаплъыхьэкIэ, тарихъ паркым дащэщтых, нэужым псыкъефэххэм ядэхагъэ арагъэ­лъэгъущт. Зыми фэмыдэ тарихъ паркым къыращэлIэжьыщтых.

ЯплIэнэрэ мафэр — Выборг. Къалэм итарихъ щагъэгъозэщтых, ижъыкIэ рыцарскэ зэнэкъокъухэр зыщыкIощтыгъэхэ унэм рагъэблэгъэщтых, сэшхом зэрэфэIэпэIасэхэр къарагъэлъэгъущт.
Проектым хэлажьэхэрэр Москва зэрэнэсыщтхэ ыкIи къызэрэкIожьыщтхэ транспортыр къафызэпызыгъэфагъэр АР-м и ЛIышъхьэ и Администрациерэ IофшIэнымкIэ ыкIи социальнэ хэхъоныгъэмкIэ и Министерствэрэ.
ХэушъхьафыкIыгъэ дзэ операцием иветеранхэр щыIэныгъэм хэгъэгъозэжьыгъэнхэмкIэ ыкIи ахэм яунагъохэм IэпыIэгъу афэхъугъэнымкIэ проектэу «Тиехэр гу итынэхэрэп» зыфиIорэр амалышIу хъугъэ. ЛIэужхэр зэрипхынхэмкIэ, лъэпкъ зыкIыныгъэр гъэпытэгъэ­нымкIэ ащ ишIуагъэ къэкIо.
— Къэралыгъом икъэлэшхохэр тилIыхъужъхэм къакIухьащтых, ичIыпIэ дахэхэр къара­гъэплъыхьащтых. ВетеранхэмкIэ ыкIи ахэм яунагъохэмкIэ зекIогъу пэпчъ хъугъэ-шIагъэу щыт. Шъолъыр пэпчъ якультурэ, яшэн-хэбзэ зэхэтыкIэхэр зэрагъашIэх, музейхэр, лъэпкъ паркхэр къаплъыхьэ. Гъогууанэ пэпчъ зэрэгъэшIэгъоным имызакъоу, уагъэгъуазэ. Анахь шъхьа­Iэр – хэушъхьафыкIыгъэ дзэ операцием иветеранхэм ыкIи яуна­гъохэм загъэпсэфын, акIуа­чIэ зэтырагъэуцожьын алъэ­кIыщт. ЗекIохэм ауж ахэм гухахъо агъоты, гъэхъагъэхэр ашIынхэм фаблэ мэхъух, ары тэ тиIофшIэни зытегъэпсыхьагъэр, — хигъэ­унэфыкIыгъ УФ-м зыкъэухъу­мэжьынымкIэ иминистрэ игуа­дзэу, къэралыгъо фондэу «Хэгъэгум иухъумакIохэр» зыфиIорэм ипащэу Анна Цивилевам.