Бюджет ахъщэр атыгъугъ
Адыгеим ихэбзэухъумэкIо къулыкъухэм къыхагъэщыгъ муниципальнэ зэзэгъыныгъэ зыщызэдашIыгъэ лъэхъаным бюджет мылъкум щыщ зэратыгъугъэр.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм иIофышIэхэмрэ Адыгэ Республикэм хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэуцужьыгъэнымкIэ и ГъэIорышIапIэрэ зэгъусэхэу къыхагъэщыгъ муниципальнэ зэзэгъыныгъэм игъэцэкIэн зыщыкIогъэ лъэхъаным бюджет ахъщэм щыщ атыгъугъэу.
Лъыхъон Iофтхьабзэхэм ялъэхъан зэрагъэунэфыгъэмкIэ, 2023-рэ илъэсым Мыекъопэ районым имуниципальнэ образованиехэм ащыщ горэм иадминистрациерэ унэхэм, псэуалъэхэм яшIын фэгъэзэгъэ компаниемрэ псырыкIуапIэхэм язэтегъэпсыхьанкIэ сомэ миллион 17-м ехъу зыпэIухьащт зэзэгъыныгъэ зэдашIыгъагъ.
Ащ ыуж фирмэм ипащэ псэолъэшI участкэм ипащэ гуригъэIон ылъэкIыгъ ахъщэу къыхагъэкIыгъэм изы Iахь атыгъунэу. Ащ нэужым проект-сметэ ыкIи отчет документхэмкIэ амыгъэцэкIэгъэ Iофхэр агъэцэкIагъэхэу тхылъхэм аратхагъ. БзэджэшIэгъэ гухэлъ зиIэу зэгохьэгъэ нэбгыритIум бюджетым сомэ миллиони 2-рэ мин 300-м ехъу хатыгъукIыгъ. Ахъщэр ашъхьэ иIоф пэIуагъэхьагъ.
УплъэкIун Iофхэм афэхъугъэ кIэуххэм атетэу Урысыем и Уголовнэ кодекс ия 159-рэ статья ия 4-рэ Iахь тегъэпсыхьагъэу ахэм уголовнэ Iоф къафызэIуахыгъ. Мы лъэхъаным зэрахьэрэ оперативнэ-лъыхъон Iофтхьабзэхэр зэпхыгъэхэр бзэджэшIагъэм лъапсэ фэхъугъэхэр зэкIэ гъэунэфыгъэнхэр ары.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм ипресс-къулыкъу