Автомобиль гъогухэмкIэ гъэIорышIапIэу «Адыгеяавтодорым» ­къызэритырэмкIэ, гъогоу «Пэнэжьыкъуай — Городскоир — Гъобэ­къуай» зыфиIорэм изы Iахь игъэцэкIэжьын
ООО-у «Теуцожь ДРСУ-м» иIофышIэхэм ыкIэм нагъэсыгъ.

Лъэпкъ проектэу «ЩыIэны­гъэм пае инфраструктурэр» зы­фиIорэм ишIуагъэкIэ IофшIэнхэр зэшIуахых.
Адыгэ Республикэм псэо­лъэшIынымкIэ, транспортымкIэ, псэупIэ-коммунальнэ хъызмэтымкIэ и Министерствэ тызэ­рэщигъэгъозагъэмкIэ, джырэ лъэ­хъан тишъолъыр ит къалэхэм ыкIи районхэм апхырыкIырэ гъогухэр шапхъэхэм адиштэнхэм пае гъэцэкIэжьын IофшIэнхэр ащызэхащагъэх.
Мы илъэсым километрэ 70-м къехъум къыхиубытэрэ гъогу псэолъэ 25-мэ ащылэжьэщтых. Ахэм афэгъэзэгъэ хъызмэтшIапIэхэм зэзэгъыныгъэу адашIыгъэм къызэрэдилъытэу, гъэцэ­кIэжьын IофшIэнхэр Iоныгъом и 1-м ехъулIэу аухынхэ фае.
Къуаджэхэу Пэнэжьыкъуаерэ Гъобэкъуаерэ зэзыпхырэ гъогоу къутырэу Городскоим дэкIырэм асфальт тыралъхьагъ. Джы гъо­губгъур агъэтэрэзы. Ащ къыкIэ­лъыкIоу гъогум ищыкIэгъэ тамыгъэхэр тырагъэуцощтых.
ГъэцэкIэжьын IофшIэнхэр зыщыкIорэ гъогу Iахьым зы километрэрэ метрэ 200-рэ икIыхьагъ. Ащ пэIухьанэу сомэ миллион 21-рэ мин 300-рэ хъызмэтшIапIэм къыфатIупщыгъ.
Гъогоу агъэцэкIэжьырэм социальнэ мэхьэнэ ин иI — Теу­цожь районым ит чылэгъуищыр зэрепхы. IофшIэнхэр заухырэм, ащ щынэгъончъэу ыкIи гупсэфэу урыкIон плъэкIыщт.
Гъомлэшк Байзэт.