Мэкъуогъум и 24-м къыщыублагъэу бэдзэогъум и 10-м нэс боксерхэм яегъэ­джэн-зыгъэхьазырын
Iоф­тхьабзэхэр Къырым ­икъалэу Судак щырекIо­кIы­гъэх.

Мыхэм ахэлэжьагъэх Мыекъопэ спорт еджапIэу Джэнчэтэ СултIан ыцIэ зыхьырэм зыщызыгъэсэрэ кIалэхэри. Урысыем испортсменхэм ямызакъоу, Узбе­кистан, Таджикистан къарыкIы­гъэхэри ащ щыIагъэх. ЗэкIэмкIи илъэс 13 — 16 зыныбжь пшъэшъэжъые ыкIи шъэожъые нэбгыри 160-м ехъу ахэм ахэлэжьагъ.
Тренировкэхэр, егъэджэнхэр заухыхэм, зэнэкъокъухэу «Битва за крепость» аIуи зэджагъэхэр мэфиплIырэ рагъэкIокIыгъэх. Мые­къопэ спорт еджапIэм зыщызыгъасэхэрэм ухьазырыныгъэ дэгъу къагъэлъэгъуагъ, хагъэунэфыкIырэ чIыпIиплI аубытыгъ. Кушъу Ис­лъам зэнэкъокъухэм текIоныгъэ къащыдихыгъ, апэрэ чIыпIэр ыубы­тыгъ. Дэчъэ Анзаур ыкIи Виктория Врадий тыжьын медальхэр къа­хьыгъэх. Къуижъ Джамбулат джэр­зыр къыфагъэшъошагъ.
Мы Iофтхьабзэм тиспортсменхэр хэлэжьэнхэ алъэкIыгъ Адыгэ Республикэм боксымкIэ и Федерацие ипащэу Сихъу Аскэр иIэпыIэгъу ишIуагъэкIэ.