Адыгеим ичIыгулэжьхэм мэфэ ошIу­хэр къызфагъэфедэхэзэ Iоны­гъор лъагъэкIуатэ. Игъом ыкIи кIэзыгъэ фэмыхъоу къагъэкIыгъэ бжыхьасэхэр Iуахыжьыным алъэкI ра­хьылIэ.

Мыгъэ пстэумкIи бжыхьэсэ гектар 97188-рэ апхъыгъагъ. Ащ щыщэу 8380-р хьэм рагъэу­бытыгъ, коцыр гектар 88626-рэ мэхъу. Джащ фэдэу рапс гектар 10433-рэ, тритикалеу 182-рэ халъхьэгъагъ.
АР-м мэкъу-мэщымкIэ и Министерствэ тызэрэщигъэгъозагъэмкIэ, хьэм иIожьын аухыгъ. Зы гектарым, гурытымкIэ лъытагъэу, центнер 50,7-рэ къырахыжьыгъ. ГъэрекIо елъытыгъэмэ, ар центнери 3,6-кIэ на­хьыб. ЗэкIэмкIи тонн 42433-рэ къаугъоижьыгъ. Хьэм анахь лэжьыгъэ бэгъуагъэ къизыхыгъэхэр Джэджэ районым ичIыгулэжьхэр ары. ПстэумкIи бжыхьэсэ хьэ гектар 2045-рэ яIагъ, гурытымкIэ лъытагъэу, зы гектарым центнер 54-рэ къырахыгъ.
Адыгеим ичIыгулэжьхэм зэкIэми коцым иIожьыни ра­гъэжьагъ. Бэдзэогъум и 16-м ехъулIэу коцым ызыныкъо Iуа­хыжьыгъах. ГурытымкIэ гектар 43700-м центнер 58,9-рэ къырахы. Ар гъэрекIо елъытыгъэмэ, центнери 9,2-кIэ нахьыб.
Джэджэ районыр мыщкIи апэ ит. Гектар 24519-у ащ ичIыгулэжьхэм халъхьэгъагъэм щыщэу гектар 12905-рэ хагъэ­кIыгъ, гурытымкIэ лъытагъэу центнер 63,6-рэ къырахы. Джащ фэдэу гурыт къэгъэлъэгъоным нахьыбэ къыщырахы Кощхьэблэ (центнер 59,4) ыкIи Теуцожь (59,1-рэ) районхэм.
Рапс гектар 10433-рэ пстэумкIи республикэм щыхалъхьэ­гъагъ. Ащ иIухыжьын ыкIэм фэ­кIо. ГурытымкIэ лъытагъэу, ащ центнер 26,1-рэ къекIы. Тритикалеу Джэджэ, Шэуджэн, Тэхъутэмыкъое районхэм ащапхъыгъагъэм иIухыжьын джыри фежьагъэхэп.
Мафэ къэс Iоныгъом комбайнэ 396-рэ хэлажьэ. Лэжьыгъэм иIухыжьын дакIоу къаунэкIы-
рэ чIыгухэр агъэкъэбзэжьых, ажъох, агъэушъэбых.
Делэкъо Анет.