«Бзылъфыгъэгум ышъо­хэр» («Краски женской души») зыфиIорэ зэнэ­къокъу-къэгъэлъэгъон ­КъокIыпIэм щыпсэурэ ­лъэпкъхэм яискусствэкIэ къэралыгъо музеим ­и Къутамэу Мыекъуапэ щыIэм къыщызэIуахыгъ. АР-м ибзылъфыгъэхэм, исурэтышIхэм ясоюзхэр ащ икIэщакIох.

Культурэмрэ мамырныгъэмрэ къэзыухъумэхэрэ творческэ бзылъфыгъэхэм къэгъэлъэгъоныр афэгъэхьыгъ. ПстэумкIи бзылъфыгъэ 44-рэ ащ хэлажьэ. Ахэм аныбжь илъэс 18-м къыщегъэжьагъэу 78-м нэсы. ЖивописымкIэ, графикэмкIэ ыкIи декоративно-­прикладной искусствэмкIэ зы­къагъэлъэгъуагъ. Iофтхьабзэм икъызэIухын къыдыхэлъытагъэу лъэныкъуищымкIэ анахь дэгъу­хэм ацIэхэр къыраIуагъэх. Щытхъу тхылъхэмрэ ахъщэ шIухьафтынхэмрэ ахэм аратыгъэх. Живо­писымкIэ апэрэ чIыпIэр фагъэшъошагъ Светлана Яшниковам. Декоративно-прикладной искусст­вэмкIэ текIоныгъэр нэбгыритIумэ зэдагощыгъ: IэпэIасэу, мы музеим иIофышIэу, къэгъэлъэгъоным игъэпсын зыпшъэ дэкIыгъэу Сет Сафиетрэ АР-м исурэтышIхэм я Союз итхьаматэу Елена Абакумовамрэ. ГрафикэмкIэ анахь дэгъухэм ащыщэу ыцIэ къыра­Iуагъ Светлана Иваненкэм.
— Бзылъфыгъэм ыгу ихъыкIырэр къэшIэгъуай. Ары нахь мы­шIэми, ыгу, краскэхэм афэдэу, къолэн, дахэ нэмыкI къыщекIо­кIырэп. Дунаир зыIыгъыр бзылъфыгъэр ары — джары тинепэрэ къэгъэлъэгъонкIэ къатIо тшIои­гъор, — еIо Сет Сафиет.
Бзылъфыгъэм ихудожественнэ творчествэ цIыфхэм анаIэ къытырадзэным, зэчый зыхэлъ IэпэIасэхэм, сурэтышIхэм Iэпы­Iэгъу афэхъунхэм, джащ фэдэу унэгъо шэн-хабзэхэм яухъумэкIо бзылъфыгъэм итеплъэшIу гъэпсыгъэным зэнэкъокъу-къэгъэлъэ­гъоныр афэIорышIэ.
— Унагъом, шIулъэгъуныгъэм ыкIи шъыпкъэныгъэм я Мафэ тефэу зэнэкъокъу-къэгъэлъэгъоныр редгъэкIокIынэу тыфэягъ. Унэгъо шэн-хабзэхэм ямэхьанэ дгъэлъапIэу, тшIоIофэу щыт. Непэрэ Iофтхьабзэм ипшъэрылъ шъхьаIэхэми ар ащыщ. Унэгъо пытэм, дахэм ылъапсэр бзылъфыгъэр ары, — еIо АР-м ибзылъ­фыгъэхэм я Союз иправле­ние итхьаматэу Ирина Сергеевам.
Iофтхьабзэм икъызэIухын ыуж хьакIэхэр зэкIэ IофшIагъэхэм яплъыгъэх. Къэгъэлъэгъоныр мы мазэм ыкIэ нэс кIощт.
Анцокъо Ирин.