Къэбэртэе-Бэлъкъарым инароднэ тхакIоу, кинорежиссер, сценарист, продюсер, композитор, орэдус, псэпэшIэ цIэрыIоу щытыгъэ ­Къандур Мухьадин ыцIэкIэ дунэе литературнэ зэнэ­къокъу шы­шъхьэIум и 1-м къыщегъэжьагъэу чъэпы­огъум и 1-м нэс щыIэщт.

«Тхылъ зэIухыгъ» зыфиIорэ зэнэ­къо­къур зэхэзыщэрэр тилъэпкъэгъу цIэрыIом ишъхьэгъусэу, тхакIоу, уса­кIоу Бэлагъы Люб.
Мухьадин дунаир зихъожьыгъэр илъэситIу зыщыхъурэм ехъулIэу Любэ мурад ышIыгъ ащ фэдэ зэ­нэкъокъу зэхищэнэу, литературэм зыгу фызэIухыгъэхэр, дэ­гъоу тхэхэрэр пчэгум къырищэнхэу, ацIэ дунаим щызэлъаригъэшIэнэу.
«Мы Iофым лъапсэ фэхъугъэр Мухьадин тызэрэфэшъыгъорэм иза­къоп, кIэнэу ащ къыгъэнагъэм илъэ­пIагъэ куоу зэрэзэ­хатшIэрэм ар итамыгъ. А кIэн баир хэкум къэщэжьыгъэныр къытпыщылъ Iофхэм ащыщ. «Тхылъ зэIухыгъ» зыфиIорэр Къан­дур Мухьадин икIэн ухъу­мэгъэным изы Iахьэу, адыгэ культурэм зиужьыжьыным, уасэу ащ фашIырэм зыкъегъэIэтыгъэным афэ­IорышIэщт, тхэныр езыгъэжьэгъа­кIэхэр литературэм нахь тезыгъэгушхощтхэ лъэ­бэкъоу щыт. ТхэкIо, усэкIо ныбжьыкIэхэр зэнэкъокъум хэлэжьэнхэу къетэгъэблагъэх. Адыгэ­хэм ямызакъоу, хымэ лъэпкъ­хэм, къэралыгъохэм ащыщхэу Урысыем, адыгэхэм ятарихъ, якультурэ афэгъэхьыгъэ тхыгъэхэр зиIэхэр ащ хэ­лэжьэнхэ алъэкIыщт.
Адыгэ лъэпкъым фэгъэхьыгъэу тхэхэрэр Урысыем и Президент игрант щыщкIэ сигуапэу згъэгушIощтых. СигухэлъкIэ къыздезыгъэштэрэ пстэуми лъэшэу са­фэрэзэщт», — къыIуагъ Любэ.
Тхыгъэхэр сыд фэдэрэ жанрэ илъхэми хъущт: прозэр, поэзиер, эссер. Урысыбзэ­кIэ тхыгъэхэр зэ­рэщытхэм фэдэу, адыга­бзэкIэ тхыгъэхэр урысыбзэкIи зэдзэкIыгъэхэу president@siffa.media зыфиIорэм агъэхьынхэ фае.
Любэ къызэрэтиIуагъэмкIэ, тхыгъэ анахь дэгъухэр къызыдэхьащтхэ тхылъ шъхьаф къыдагъэкIыщт, Урысыем илитературнэ тедзэгъу цIэры­Iохэми ахэр къа­щыхаутыщтых.
Зэнэкъокъум щатекIохэрэр 2025-рэ илъэсым шэкIогъум и 14 — 15-м Шъачэ щагъэшIощтых. ТхэкIо ныбжьыкIэхэм якъэ­лэмыпэ къыпыкIы­гъэхэр къызыдэхьащт тхылъ къызэ­рэдагъэкIыщтыр а зэIукIэм къыща­Iощт. ХьакIэ лъапIэхэр, литерату­рэмкIэ дунаим щыцIэрыIохэр ащ къыра­гъэблэгъэнхэ ямурад. Адыгэхэм ялъэпкъ кIэн, якультурэ, ятарихъ афэгъэхьыгъэ лекциехэр, мастер-­классхэр, зэдэгущыIэгъухэр мы зэ­фэсым щызэхащэщтых.
НэкIэпыджэ Замир.