Егъэджэн программэу мэфитIум телъытагъэу «ЦIыфым пае архитектурэр» зыфиIоу УФ-м ишъолъырхэм япащэхэмрэ гъэIорышIэкIо купхэмрэ атегъэпсыхьагъэр СберУниверситетым щаухыгъ. Адыгеим и ЛIышъхьэу КъумпIыл Мурат мы проектым хэлэжьагъ.

Джащ фэдэу Адыгеим илIыкIо куп хэтыгъэх вице-­премьерыр, архитектурэмкIэ комитетым итхьаматэ, Мые­къуапэ имэр, къалэм иархитектор. Программэм хахьэщтыгъэ Iофтхьабзэхэр зыфытегъэпсыхьэгъагъэхэр къэлэ щыIэкIэ Iэрыфэгъум игъэ­псынкIэ шэпхъэ шъхьаIэхэр ары: пстэуми апшъэ цIыфыр гъэуцугъэныр, культурэ кIэныр къэухъумэгъэныр, пэрыт технологиехэр къэлэгъэпсыным щыгъэфедэгъэнхэр.
«Мы лъэныкъомкIэ тэрырэ СберУниверситетымрэ проектхэр зэдэтэгъэцакIэх. Урысыем и Президент и Ад­министрацие, Сбербанкым, Гер­ман Греф лъэшэу тафэраз чIыпIэ дахэхэр зэрэзэтебгъэ­псыхьащтхэ шIыкIэмкIэ практикумым илъэхъан екIолIэ­кIа­кIэхэр зэрэтагъэшIагъэм фэшI.
Республикэм ипсэупIэхэм язэтегъэпсыхьанкIэ тэ бэ зэ­шIотхырэр. Ау уахътэр зы чIыпIэ зэримытыр, къэлэ щыIэкIэ Iэрыфэгъум игъэ­псынкIэ Iофэу тшIэрэр джырэ шапхъэхэм зэрадиштэн фаер къыдгурэIо. IофшIэкIэшIоу мы лъэныкъомкIэ щыIэхэр къызIэкIагъэхьанхэм, екIолIэкIа­кIэхэр зэрагъэфедэхэрэр алъэгъунхэм мэхьанэшхо яI.
ШIэныгъэу зэдгъэгъотыгъэ­хэр, игъоу къытфалъэгъугъэ­хэр ыужкIэ къытшъхьапэщтых, тиреспубликэ зекIонымкIэ амалэу иIэхэр ­къыдэтлъытэзэ, щыIэныгъэм ахэр щыд­гъэфе­дэщтых. Федеральнэ гупчэр тиIэпыIэгъоу псэупIэ­хэмрэ общественнэ чIыпIэ­хэмрэ ятеплъэ нахь дахэ шIы­гъэным тыдэлэжьэщт», — къыIуагъ КъумпIыл Мурат.

Республикэм ипащэ къызэрэхигъэщыгъэмкIэ, апэрэ чэзыоу ар зэпхыгъэр проектэу «Къэлэ щыIэкIэ Iэрыфэгъум игъэпсын» зыфиIорэр ары. Ащ диштэу илъэс къэс общественнэ чIыпIэхэр, паркхэр, щагухэр, псыIушъохэр нахь зэтегъэпсыхьагъэ мэхъух. Илъэси 6-м къыкIоцI щагу 204-рэ, общественнэ чIыпIэ 97-рэ, щагу 31-рэ, общественнэ чIыпIи 8-рэ гъэрекIо шапхъэхэм адиштэу зэтырагъэпсыхьагъэх. Мыщ фэдэ Iофхэм къэлэдэсхэм къазэрадырагъаштэрэм мэхьанэшхо иI.
Адыгеим икъэлэдэсхэмрэ ихьакIэхэмрэ псыхъоу Шъхьэгуащэ иIушъорэ Мэз­дахэрэ анахь якIэсэ зыгъэпсэфыпIэу хъугъэх. Къэралыгъо программэу «Къуа­джэхэм зэдиштэу хэхъоныгъэ ягъэшIыгъэныр» зыфиIорэм диштэу инфраструктурэр агъэкIэжьы. Инициативнэ бюджетированием ишIуагъэкIэ къуа­джэхэм, къутырхэм ятеплъэ нахь дахэ мэхъу.
«Коммунальнэ хъызмэтхэр джырэ шапхъэхэм адиштэу зэтегъэпсыхьэ­гъэнхэр Iофыгъо къызэрымыкIоу, ау мэхьанэшхо зиIэу щыт. Гъогухэм язытет нахьышIу шIыгъэнымкIэ, общественнэ транспортым нахь дэгъоу Iоф ышIэнымкIэ, социальнэ инфраструктурэм изегъэушъомбгъункIэ гухэлъ гъэ­нэфагъэхэр тиIэх. Лъэпкъ проектэу «ЩыIэныгъэм пае инфраструктурэр» зыфиIорэр ахэм алъэIэсы. Къэлэ щыIэкIэ Iэрыфэгъум тегъэпсыхьэгъэ Iоф­тхьабзэхэр ащ диштэу зэрахьащтых. УФ-м и Правительствэ и Тхьаматэ игуадзэу Марат Хуснуллиным игущыIэ шIуагъэ къытэу ащ фэдэ амалхэр зэ­рэбгъэфедэщт шIыкIэр къыщыхигъэщыгъ. ЦIыфхэм ящыIэкIэ-псэукIэ зы­къегъэIэтыгъэнымкIэ, Урысыем и Президентэу Владимир Путиным къыгъэуцугъэ пшъэрылъхэм ягъэцэкIэнкIэ тфэлъэкIырэр зэкIэ тшIэщт», — къыхи­гъэщыгъ Адыгеим и ЛIышъхьэ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.