Шъолъыр хэдзэкIо комиссиехэм ятхьаматэхэр зыхэлэжьэгъэхэ Урысые зэIукIэу Урысые Федерацием хэдзынхэмкIэ и Гупчэ комиссие зэхищагъэр къалэу Саратов бэмышIэу щыкIуагъ. Адыгэ Респуб­ликэм хэдзынхэмкIэ и Гупчэ комиссие и Тхьаматэу Сэмэгу Нурбый ащ хэлэжьагъ.

ЗэIукIэм илъэхъан Урысыем хэдзынхэмкIэ и Гупчэ комиссие итхьаматэу Элла Памфиловам хэдзакIохэм амакъэ зыщатыщт мэфэ зыкIым — 2025-рэ илъэсым Iоныгъом и 14-м хэдзынхэмкIэ системэм пшъэрылъ шъхьаIэу иIэщтхэр къыгъэнэфагъэх. Цифрэ технологиехэр хэдзынхэм ащыгъэфедэгъэн, хэдзынхэм язэхэщакIохэр нахьышIоу егъэджэгъэнхэ, ныбжьыкIэхэр нахь чанэу хэдзын Iофтхьабзэхэм ахэгъэлэжьэгъэнхэ зэрэфаем лъэшэу анаIэ тырарагъэдзагъ.