Адыгеим и ЛIышъхьэу КъумпIыл Мурат къызэриIуагъэмкIэ, Херсон хэкум и Геническэ районэу республикэм ынаIэ зытетым хэхъоныгъэ ышIынымкIэ ыкIи ар зыпкъ игъэуцожьыгъэнымкIэ IофшIэныр лъэкIуатэ.

Джащ фэдэу хэгъэгум ишъолъырыкIэхэм ащыпсэухэрэм ыкIи хэушъхьафыкIыгъэ дзэ операцием хэлажьэхэрэм лъэныкъо зэфэшъхьафхэмкIэ IэпыIэгъу араты. Мыщ фэдэ IэпыIэгъум тегъэ­псы­хьагъэу хьылъэхэу Iэшэ-шъуашэхэр, Iэзэгъу уцхэр, псэолъапхъэхэр ыкIи гъо­мылэпхъэ зэфэшъхьафхэр зыхахьэ­хэрэр Урысыем идзэкъулыкъушIэхэм апае атIупщых. НепэкIэ шIушIэ хьылъэ тонн мини 3,7-м ехъу хэушъхьафыкIыгъэ дзэ операцием ишъолъыр нагъэсыгъах.
КъумпIыл Мурат къызэрэхигъэщы­гъэмкIэ, партиеу «Единэ Россием» ипрограммэ къыдыхэлъытагъэу зичэзыу хьылъэр атIупщыгъ. ТынаIэ зытедгъэтырэ подразделениехэм пшъэрылъэу яIэхэр агъэцэкIэнхэмкIэ ящыкIэгъэщт Iэмэ-псымэ ыкIи техникэ гъэнэфагъэр алъы­Iэсыщт. Республикэм и ЛIышъхьэ къызэриIуагъэмкIэ, чIыпIакIэхэм ащыпсэухэ­рэм ыкIи хэушъхьафыкIыгъэ дзэ операцием хэлажьэхэрэм яфэныкъоныгъэхэр икъоу гъэунэфыгъэнхэмкIэ ыкIи Iэпы­Iэгъу ятыгъэнымкIэ хэбзэ къулыкъухэм къатефэрэр ашIэ.
«Народнэ фронтымрэ» гуфэкIо организациехэмрэ зэгъусэхэу а шIушIэ Iоф­тхьабзэхэм япхыгъэ IофшIэныр лъагъэ­кIуатэ. Илъэсэу икIыгъэм партиеу «Единэ Россием» ишъолъыр гъэцэкIэкIо комитетрэ шIушIэ объединениехэмрэ кIэщакIо зэрэфэхъугъэхэм тетэу Координационнэ гупчэр зэхащагъ. Ащ организацие 40 хэхьэ. ШIушIэ IэпыIэгъоу ящыкIагъэр игъом алъыгъэIэсыгъэнымкIэ ыкIи транспортым епхыгъэ Iофыгъохэр зэшIохыгъэнхэмкIэ ащ ишIуагъэ къэкIо.
— ДзэкIолIхэм, ахэм ягупсэхэм, джащ фэдэу шъолъырыкIэхэм ащыпсэухэрэм IэпыIэгъу язытырэ гуфакIохэм «тхьашъуе­гъэпсэушхо» ясэIо. Ахэм техникэ гъэнэфагъэр, заор зыщыкIорэ чIыпIэм къыщызфагъэфедэн алъэкIыщт пкъыгъохэр къаугъоих ыкIи аIэкIагъахьэх, тиухъумакIохэм яугупсэхэми адеIэх. Тибзылъфыгъэхэм мафэ къэс хъытыухэр ахъых, письмэхэр, унагъохэм ащагъэхьазырырэ шхыныгъохэр ыкIи нэмыкIхэр хэушъхьафыкIыгъэ дзэ операцием хэлажьэхэрэм алъагъэIэсынхэм епхыгъэ Iофтхьабзэхэр зэшIуахых. ТидзэкIолIхэмкIэ ащ фэдэ IэпыIэгъум мэхьанэшхо иI, — къыIуагъ КъумпIыл Мурат.