БзэджэшIагъэ ыкIи административнэ хэбзэукъоныгъэ зезыхьэрэ ныбжьы­кIэ­хэм пшъэдэкIыжьэу арагъэхьын алъэкIыщтхэр щыIэхэр зыфэдэхэм афэ­гъэхьыгъэу Адыгеим иполицие икъулыкъушIэхэм Iофтхьабзэхэр зэ­хащэх.

Унагъохэм ыкIи кIэлэцIыкIухэм яправовой шIэныгъэхэм ахэгъэхъогъэнымкIэ Урысые тхьама­фэм хахьэу джырэблагъэ хэбзэухъумэкIо къулыкъу­шIэхэм Мыекъуапэ дэт гурыт еджапIэу N 3-м Iэнэ хъурае щызэхащагъ.
Iофтхьабзэм хэлэжьагъэх зыныбжь имыкъу­гъэхэм яIофхэмкIэ ыкIи ахэм яфитыныгъэхэр къэу­хъумэгъэнхэмкIэ Ко­миссием хэтэу Виктория Вар­танян, гъэсэныгъэмкIэ гъэIорышIапIэм илIыкIоу Игнат Широковыр, зыныбжь имыкъугъэхэм яIофхэмкIэ ыкIи АР-м хэгъэгу кIоцI IофхэмкIэ
и Министерствэ наркотикхэр хэбзэнчъэу къе­зыгъэкIокIыхэрэм алъыплъэгъэнымкIэ и ГъэIорышIапIэ ялIыкIохэр, кIэлэеджакIохэр ыкIи ахэм янэ-ятэхэр.
Полицием икъулыкъу­шIэ­хэм кIэлэцIыкIухэр щагъэгъозагъ наркотикхэр хэбзэнчъэу къезыгъэкIо­кIыхэрэм пшъэдэкIыжьэу ахьырэм. Шъыпкъэ, Iэта­хъохэр бэхэм дахьыхынхэ алъэкIыщт, ау хэбзэу­хъумэкIо къулыкъухэм зэ­ралъытэрэмкIэ, ныбжьыкIэхэм къагурыIон фае мыщ пшъэдэкIыжьэу пы­лъыр зыфэдэр.
КъулыкъушIэхэм кIэлэ­еджакIохэм агу къагъэ­кIыжьыгъ наркотик лъэпкъэу щыIэхэр зыфэдэхэр, ахэр псауныгъэм ыкIи ныбжьыкIэхэм япсихикэ лъэшэу зэрягуаохэрэр. Анахьэу анаIэ зытыра­гъэтыгъэр УФ-м и Уголовнэ кодекс истатьяу наркотикхэм япхыгъэу бзэ­джэшIагъэ зезыхьэгъэ ныбжьыкIэхэм афэгъэхьыгъэм изэхэфын.
Джащ фэдэу полицием иофицерхэм къаIотагъ хэбзэукъоныгъэ зезыхьэгъэ ныбжьыкIэхэр учетым зэрэхагъэуцохэрэр, ащ къыхэкIэу ящыIэныгъэ къутагъэ зэрэхъурэр. Нэ­ужым наркотикхэр къызэрэрагъэкIокIырэм, ахэм ныбжьыкIэхэр ахащэхэзэ гъэбылъыпIэхэм зэрэщагъэтIылъхэрэм афэгъэ­хьыгъэ видеокъэгъэлъэ­гъоным кIэлэеджакIохэр рагъэплъыгъэх.
КIэухым полицием ­икъулыкъушIэхэр кIэлэ­еджакIохэм къяджагъэх хабзэр амыукъонэу, бзэ­джашIэхэм зэрамыгъэ­гъэделэнхэу, ашIэрэм уасэ фашIынэу.