Адыгэ Республикэм хэгъэгу кIоцI IофхэмкIэ и Министерствэ изэфэхьысыжьхэм къызэрагъэлъагъоу, мы аужырэ мафэхэм шъолъырым щыпсэухэрэм мызэу, мытIоу гъэпцIагъэ зыхэлъ бзэджэшIагъэхэр адызэрахьагъэх.

Полицием и Кощхьэблэ район отдел тхьаусыхэ тхылъ къыхьыгъ илъэс 50 зыныбжь хъулъфыгъэу мы чIыпIэм щыпсэурэм. Ащ къызэриIотагъэмкIэ, охътэ гъэнэфагъэкIэ узэкIэIэ­бэ­жьымэ, Интернетым иамалхэр къызфигъэфе­дэхэзэ, бзылъфыгъэу Iэ­кIыб къэрал щыпсэурэм нэIуасэ фэхъугъагъ.
НэбгыритIум азыфагу зэгурыIоныгъэ илъэу хъулъ­фыгъэм къызыщэ­хъум, ахъщэу сомэ мин 50 инэIосакIэ фигъэхьыгъ. Ау джащ дэжьым нэIосэныгъэри кIодыгъэ бзылъфыгъэм зэпхыны­гъэу дыриIагъэри зэпыугъ. Джы полицием икъулы­къушIэхэр бзэджашIэм икъыхэгъэщын ыкIи икъэу­бытын ыуж итых. Ахэр зэ­регуцафэхэрэмкIэ, мы­хъо-мышIэр зезыхьагъэр тикъэралыгъо щэпсэу. Уго­ловнэ Iоф къызэIуа­хыгъэу зэхафы.
Мыекъопэ районым щы­псэурэ бзылъфыгъэу илъэс 35-рэ зыныбжьым ымышIэрэ цIыфхэм ИнтернетымкIэ къэбар къы­IэкIагъэхьагъ ахъщэу иIэр Iоф горэм хилъхьэмэ охъ­тэ кIэкIым ащ фе-дэшхо къыкIэкIощтэу. Къы­раIуагъэр зышIошъ хъу­гъэм сомэ мин 25-рэ джащ лъыпытэу къыдэгущыIагъэхэм афитIупщыгъ. Ащ нэужым пыщэгъу къы­фэхъугъэхэр псынкIэу кIо­дыгъэх, телефонымкIи джэуап къатыжьыгъэп. Джы гъэпцIакIохэм ялъэуж къулыкъушIэхэм афы.
Адыгеим иполицие джыри зэ республикэм щы­псэухэрэм закъыфегъазэ: шъумышIэрэ цIыфхэу зыкъышъуфэзыгъазэхэу, ахъщэм къырыгущыIэхэрэм аIорэр шъушIошъ шъумыгъэхъу. Къэбарэу къыпIэкIэхьагъэм рэхьатэу уегупшысэнышъ, Iофэу узхащэрэр нахь куоу зэ­хэпфын фае.
ГъэпцIэгъэ Iоф цIыфым ылъэныкъокIэ зэрахьагъэу щытмэ, полицием ите­лефон номерэу 02-мкIэ (мобильнэ зэпхыкIэмкIэ — 102) утеон фае, банкэу зикартэ бгъэфедэрэми ма­къэ ебгъэIунэу щыт.
Гъомлэшк Байзэт.