Атлетикэ псынкIэмкIэ Урысыем изэнэкъокъухэр къалэу Краснодар щыкIуагъэх. Ахэм ахэлэжьагъ ­Мыекъуапэ щыщ Ирина Мащенкэр.

Иринэ республикэ спорт еджапIэу N 1-м зыщегъэхьазыры. Итренерхэу Игорь ыкIи Екатерина Потоцкэхэм яIэпэIэсэныгъэ, ежь игуетыныгъэ яшIуагъэкIэ ухьазырыныгъэ дэгъу ащ иIэ зэрэхъугъэр зэнэ­къокъухэм къащиушыхьатыгъ.
Илъэс 18-м нэс зыныбжь пшъэшъэжъыехэм язэнэкъокъу гъэшIэгъонэу кIуагъэ. Мыхэм ахэлэжьагъэх Урысыем ишъолъыр зэфэ­шъхьафхэм къарыкIыгъэ спорт­сменхэр.
Метрэ 200-р къэзычъырэ купым пэрытныгъэр щызыIыгъыгъэ Влада Пинчук (Ростов хэкур) къытечъын, къызэринэкIын ылъэкIыгъ пшIошIэу Иринэ дэгъоу къачъэщтыгъ, ау ятIо­нэрэу финишым къэсыжьыгъ. Уахътэу а гъогууанэм тыригъэкIодагъэр — 25.44-рэ, текIоныгъэ зыхьыгъэм — 25.42-рэ. Джэрз медалыр ыхьыгъ Саратов хэкум къикIыгъэ Алина Ярковам.
Мы мэфэ дэдэм Краснодар щыкIуагъ илъэс 16-м нэс зыныбжь кIалэхэм атлетикэ псынкIэмкIэ язэ­нэкъокъу. Адыгеим илIыкIоу Ричард Миллер (тренерыр Юрий Баев) метрэ 400 къэзычъыгъэхэм ахэ-
тыгъ, яплIэнэрэ чIыпIэр ыубытыгъ.
Илъэс 18-м нэс зыныбжьыхэм якуп къыщычъагъ Артем Хухаревыр (тренерыр Виктор Заводин), ари яплIэнэрэу къэсыжьыгъ, Маргарита Шияновам (тренерыр Виктор Заводин) яенэрэ чIыпIэр ыубытыгъ. Мыхэм зэкIэми республикэ спорт еджапIэу N 1-м зыщагъэхьазыры.