Усть-Лабинскэ ящэнэрэу щыкIуа­гъэх «Суворовский трейл» зыфа­Iорэ зэнэкъокъухэр — пэрыохъухэр къызэранэкIызэ, гъогу гъэнэфагъэ зыщимыIэ чIыпIэхэу полководцэу Суворовым изэо гъогухэр угу къэзыгъэ­кIыжьыхэрэм къащызэпэчъэнхэр.

Зэнэкъокъум хэлажьэхэрэм къыхахын алъэ­кIынэу зэфэшъхьаф гъогуонибл афагъэ­нэфэгъагъ. Гъогууанэу метрэ 1794-рэ хъущтыгъэр Усть-Лабинскэ загъэпсыгъэ илъэсым епхыгъагъ. Къэлэ зыгъэпсэфыпIэ паркым пхырыкIыщтыгъэ гъогууанэр чъэнымкIэ ухьазырыныгъэ гъэнэфагъэ зимыIэхэм апае къыхахыгъагъ. Илъэс 14-м нэс зыныбжьыхэм зыщаушэтын алъэкIыщтыгъ джэгун-къызэпэчъэнэу «Детская миля» зыфаIуагъэм. Илъэси 9 — 15 зыныбжьыхэр купищэу гощыгъэхэу «Детская Элита» зыфаусыгъэ къызэпэчъэным хэлэжьагъэх уахътэу гъогу­уанэм тырагъэкIодагъэри агъэунэфымэ, текIоныгъэ къыдэзыхыгъэхэри къыхагъэщыхэзэ. Илъэс 16-м къехъугъэхэм азыфагу щыкIогъэ зэнэкъокъум ишапхъэхэм зэхъокIыныгъэхэр афашIыгъ. Ахэм зы километрэ къачъын, сапбордымкIэ километрэныкъоу псым хэсыхьанхэ ыкIи финишым екIурэ гъогууанэм техьажьынхэ фэягъэх.

Гъогууанэу «Т20» зыфаIуагъэр километрэ 25-рэ хъущтыгъ, ащ псыикIыгъохэу зэпыпчын фаехэр хэтхэу. «Т10» зыфаIуагъэр кило­мет­ри 10 хъущтыгъ, ащи пэрыохъу гъэнэфа­гъэхэр щызэпыпчынхэу щытыгъ. Мы гъогу дэдэм тетыгъэх километри 5 къэзычъынэу щытыгъэхэри.
Мы спорт Iофтхьабзэр ашIогъэшIэгъон хъугъэ Адыгеим испортсменхэу чъэным пылъ­хэм ащыщхэм. Тиреспубликэ икIыгъэ спортсмени 10 ащ хэлэжьагъ. Фабэр градус 35-м нэсыщтыгъэми, пэрыохъубэ зэпачынэу щытыгъэми, спортсменхэм ягуапэу зэкIэ агъэцэкIагъ, гухахъо Iофтхьабзэм хагъотагъ.
Зыныбжь илъэс 40 — 49-рэ хъугъэхэр зыхэт купым хэфэгъэ Иван Федоровым Адыгеир ифэшъуашэу къыгъэлъэгъуагъ ыкIи ящэнэрэ чIыпIэр ыубытыгъ. ЗэкIэ къызыщызэ­дэчъагъэм ар я 11-у къэсыжьыгъ, ­километ­рэ 25-р сыхьати 2-рэ такъикъ 13,33-кIэ къы­чъыгъ. ПсэупIэу Каменномостскэм щыщ Николай Артемьевыр Федоровым ыуж итэу финишым нэсыгъ, я 12-рэ чIыпIэр ыIыгъыгъ. Ар ыныбжьыкIэ зыхэтыгъэ купым (илъэс 50 — 59-рэ хъугъэхэр) апэрэ чIыпIэр ­щиубытыгъ.
Анахь гъогуонэ хьылъэр ыкIи анахь кIыхьэр къэзычъыгъэхэмкIэ анахь лъэшыгъ ыкIи текIоныгъэр къыдихыгъ Армавир къикIыгъэ Алексей Мамариным, зы сыхьатрэ такъикъ 28,28-кIэ ащ а гъогуонэ кIыхьэр къычъыгъ.