Хьыкумым ыпашъхьэ къиуцощт
Тыкъэзыуцухьэрэ дунаим ыкIи чIыопсым якъэухъумэнкIэ ыкIи ахэм язытет лъыплъэгъэнымкIэ шъолъыр гъэIорышIапIэм испециалист шъхьаIэ бзэджэшIагъэу зэрихьагъэм (иIэнатIэ къызфигъэфедэзэ, шхъухьагъэ зэрихьэзэ ахъщэ къызэрэзыIэкIигъахьэщтыгъэм) пае Урысыем и Уголовнэ кодекс ия 159-рэ статья ия 3-рэ ыкIи ия 4-рэ Iахьхэм адиштэу къыпагъэтэджэгъэ Iофым изэхэфын Урысыем и Следственнэ комитет иследственнэ ГъэIорышIапIэу Адыгэ Республикэм щыIэм ыухыгъ.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм иIофышIэхэм ыкIи Адыгэ Республикэм и МВД и ГъэIорышIапIэу къолъхьэ тын-Iыхыным пэшIуекIогъэным фэгъэзагъэм лъыхъон Iофтхьабзэу зэрахьагъэхэм яшIуагъэкIэ уголовнэ Iофыр къызэIуахыгъ.
Агъэмысэрэм 2020-рэ илъэсым щылэ мазэм къыщегъэжьагъэу 2025-рэ илъэсым щылэ мазэм нэс иIэнатIэ къызфигъэфедэзэ, псэолъэшIыным фэхъурэ пыдзафэхэм яугъоинрэ язещэнрэ афэгъэзэгъэ, гъэстыныпхъэ-щыфэ метариалхэр зэхэугъоягъэу зыщэрэ организациехэм япащэхэр ыгъапцIэхэзэ, тыкъэзыуцухьэрэ дунаим икъэбзагъэ къэухъумэгъэнымкIэ хэбзэгъэуцугъэу щыIэр аукъоу къэбар нэпцIхэр ыгъэIухэзэ ыгъэщтэнхэу ауж ихьэщтыгъ. Ахъщэ къыратымэ, административнэ пшъэдэкIыжь амыхьынымкIэ ишIуагъэ аригъэкIынэу ыгъэгугъэщтыгъэх.
Зэкъодзэн Iофхэр зэшIуихыхэзэ, специалист шъхьаIэм сатыу организациехэм яIэшъхьэтети 4-мэ сомэ миллиони 3 фэдиз къаIихыгъ.
Адыгэ Республикэм ипрокурор ыухэсыгъэ уголовнэ Iофыр нахь игъэкIотыгъэу хэплъэным пае хьыкумым фагъэхьыгъ.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм ипресс-къулыкъу