Адыгэ Республикэм и Красногвардейскэ район хьыкум илъэс 29-рэ зыныбжь, а рай­оным щыщ Эдуард Татпури уголовнэ бзэджэшIагъэу зэрихьагъэм пае пщыныжьэу тыралъхьагъэм щигъэгъозагъэх. Урысыем и Уголовнэ кодекс ия 159.2-рэ статья ия 3-рэ Iахь зигугъу къышIырэ (ахъщэ къаIихын зэхъум шхъухьэ зезыхьагъэм) бзэджэшIагъэр зэрихьагъэу алъытагъ.

ЗэрагъэунэфыгъэмкIэ, 2022-рэ илъэсым унэе хъыз­мэт Iофым фежьэнэу ащ тыриубытэгъагъ. УрыпсэунымкIэ анахь ахъщэ макIэу агъэнэфагъэм нахь мэкIэжьэу къызэратыхэрэм яунэе Iоф къызэIуахыным пае Урысые Федерацием ихэбзэгъэуцугъэ тетэу ахъщэ IэпыIэгъу зэраратырэр зешIэм, ежь къыIэ­кIахьэрэр ыушъэфи, документ нэпцIыхэр зэригъэгъоти, ахэм атетэу сомэ мин 350-рэ къыратыгъ.
Урысыем и ФСБ и ГъэIорышIапIэу Адыгэ Респуб­ликэм щыIэмрэ Адыгэ Республикэм хэгъэгу кIоцI IофхэмкIэ и Министерствэрэ зэгъусэхэу зэдызэшIуа­хыгъэ Iофтхьабзэхэм яшIуагъэкIэ Э. А. Татпури хэб­зэнчъэу зэкъуидзэгъэ Iофым ылъапсэ агъэунэ­фыгъ.
Э. А. Татпури тазырэу сомэ мин 50 тыралъхьагъ, ащ дакIоу Адыгэ Республикэм и Прокуратурэ игъоу ылъэгъугъэр агъэцэкIагъ – къэралыгъом ифедэ хэ­лъэу сомэ мин 305-рэ къытынэу ашIыгъ.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм ипресс-къулыкъу