Урысые физкультурэ-­спорт Iофтхьабзэу «IофшIэным ыкIи зы­къэухъумэжьыным сафэ­хьазыр» зыфиIорэм иреспубликэ уцугъо ыкIэм фэкIуагъ. НыбжьыкIэхэм япсауныгъэ къэухъумэгъэным, физическэ культурэм ыкIи спортым ахэр нахь апыщагъэ хъунхэм мы Iоф­тхьабзэр афытегъэпсыхьагъ. Команднэ зэнэкъокъухэмкIэ анахь лъэшыгъэх Мыекъуапэ икIэлэ­еджакIохэр.
Муниципалитети 5-мэ якомандэхэр зэнэкъокъугъэх. ИкIыгъэ илъэсым фэдэу мыгъи анахь командэ лъэшхэу зыкъагъэлъэ­гъуагъ Мыекъуапэрэ Джэджэ районымрэ ялIыкIохэм. Ау мызыгъэгум Джэджэ районым балл 2280-рэ ригъэкъугъэр, гъэрекIо — 2778-рэ иIагъ. Мыекъуапэ икомандэ нахь дэгъоу зигъэхьазырыгъэу къычIэкIыгъ — балл 2873-рэ къылэжьыгъ, гъэрекIо — 2625-рэ. Ящэнэрэ чIыпIэр ыубытыгъ Красногвардейскэ ­районым икомандэ — балл 2265-рэ.
Гъэмэфэ фестивалым хэлэжьэгъэ командэхэр къызэпэчъагъэх, къэлъагъэх, есыгъэх, щэрыонымкIи яIэпэIэсэныгъэ къагъэлъэ­гъуагъ, нэмыкI лъэныкъохэмкIи зэнэкъокъугъэх.
Командэ пэпчъ спортсмени 8 хэтыгъ: зыныбжь илъэс 12 — 13-м ыкIи илъэс 14 — 15-м арыт кIэлитIу зырызрэ пшъашъэхэмрэ. Зэнэкъокъухэм ахэлажьэрэ пэпчъ командэми очко къыфихьыщтыгъ, ежьыми баллхэр къылэжьыщтыгъ. Куп пэпчъ анахь дэгъухэр кIалэхэми пшъашъэхэми къахагъэщы-­
гъэх. Ахэр Адыгэ Республикэм изэхэугъоегъэ командэ хагъэхьащтых ыкIи Урысые фестивалэу бжыхьэм «Артекым» щыкIощтхэм хэлэжьэщтых.
АнахьыкIэхэм якуп (илъэс 12 — 13 зыныбжьыхэм) анахь дэгъоу зыкъыщагъэлъэгъуагъ Роман Сосновскэмрэ (очко 372-рэ) Полина Титоренкэмрэ (очко 424-рэ), тIури Мыекъуапэ щыщых. Илъэс 14 — 15 зыныбжьыхэм къахагъэщыгъэх Джэджэ районым щыщ Даниил Кузьменкэр (очко 369-рэ) ыкIи Мыекъуапэ икIэлэ­еджакIоу Наталья Галка (очко 393-рэ).

БзэшIу Асхьад.