ТиIофшIэгъу дэкIыгъохэм ащыщ Тэуехьаблэ щытхьызэ, Гъонэжьыкъохэм якъэлэпчъэIу почтальонэу Хьэшхъуанэкъо Мирэ къыIухьагъэу тытефагъ. ЯмэфэкI ипэгъокIэу ащ гущыIэгъу тыфэхъугъ.

Урысыем и Почтэ икъутамэу Джэ­джэхьаблэ дэтым ащ IофшIэныр 1995-рэ илъэсым щыригъэжьагъ. Тэуехьаблэхэм почтальон ямыIэжь зэхъум, илъэсиплI хъугъэу Мирэ а IофшIэным зыфигъэзагъ. Джаущтэу бзылъфыгъэ нэгушIом чылэгъуи­тIум япочтальонэу Iоф ешIэ. Илъэс 30-м къыкIоцI зищагу дэмыхьэгъэ унагъо, ынэгу зымышIэрэ цIыф къоджитIум адэ­сэп сIомэ сыхэмыукъонэу къысшIошIы.
— Сишъхьэгъусэу Ильичрэ сэрырэ илъэс пчъагъэ хъугъэу тыпочтальон. Сэ ТэуехьаблэкIэ нахь сыгъэзагъ, ау адрэр игъо фимыфэ зыхъукIэ, Джэджэхьабли гъэзетхэр къыщесэхьакIых. Мары зэрэшъулъэгъоу, тыгъэм сыхэтэу лъэсэу ащ сыкъикIи, Тэуехьаблэ сыкъэкIуагъ. Ощхи, чъыIи, фаби симыIэу сипшъэрылъ зэрэзгъэцэкIэщтым сыпылъ, — еIо Мирэ.
ЦIыфхэм гъэзетэу къыратхыкIыгъэхэр, пенсиеу къафакIорэр, нэмыкIхэри игъом аIэкIэгъэхьэгъэныр ары анахьэу почтальоныр зыпылъыр. Зэшъхьэгъусэхэм Iоф зэрэзэдашIэрэр Iэрыфэгъу, зэдеIэжьых, IофшIэныр зэтырагуащэ, къоджэдэсхэри лъэшэу къафэразэх. Мирэ мафэм километрэ пчъагъэу къыкIурэмкIэ теупчIыгъ. ЩхыпцIызэ ащ джэуап къетыжьы:
— Километрэ пчъагъэу къэскIурэр сшыгъэп, ау унэгъо пчъагъэр къэслъытэу къыхэкIы. ГущыIэм пае, пенсие тыгъор къызысыкIэ, ТэуехьаблэкIэ унэгъо 15 — 20-мэ мафэм саIухьэу къыхэкIы, ахъщэр сымыгъэгужъоным пае. А зэпстэу­ри лъэсэу къэсэкIухьэ. Лъэсэу Тэуехьаб­лэ сыкъакIо зыхъукIэ, сыкъыримыгъэтIысхьэу зы машинэ къысэбгъукIорэп, ащкIэ зэкIэми «тхьашъуегъэпсэу» ясIомэ сшIоигъу. СыкIожьы зыхъукIи джащ фэд. Ары пакIошъ, бэхэм «ИщыкIагъэмэ, къыт­фытеуи, тыкъыплъыкIонышъ укъэтщэщт ыкIи унэдгъэсыжьыщт» къысаIо. Джащ фэдизэу сызэралъытэрэм уасэ фэсэшIы.
ЧылэгъуитIумэ япочтальонэу Хьэшхъуа­нэкъо Мирэ иIофшIэн шIу елъэгъу, ыгу етыгъэу егъэцакIэ. ЦIыфхэр къызэре­жэхэрэр къыгурыIоу псынкIэу зэралъыIэ­сыщтым пылъ. Гъэзетеджэныр зикIасэхэу къежэхэрэри дэгъоу ешIэх, нэмыкIхэми афихьыжьыщтхэр зэтефыгъэхэу иIалъ­мэкъ дэлъых: псауныгъэм, хэтэрыкIхэм афэгъэхьыгъэ къэбархэр зэрыт гъэзетхэр, журнал зэфэшъхьафхэр, пенсиер, электричествэм, гъэстыныпхъэ шхъуантIэм, нэмыкI фэIо-фашIэхэм ауасэ зэратыщт тхьапэхэр.
Джыри джаущтэу ылъэ тетэу илъэсыбэрэ къэбар гушIуагъор афихьэу почтальоным Iоф ышIэнэу тыфэлъаIо!