Адыгэ къэралыгъо университетым ипроектэу «Наука вокруг» зыфиIорэр Башкортостан щыкIогъэ Урысые зэфэсэу шIэныгъэлэжь ныбжьыкIэхэм ясовет ыкIи студенческэ сообществэм хэтхэр зыхэлэжьагъэхэм къыщагъэлъэгъуагъ.

Апшъэрэ еджапIэм гухэлъхэмкIэ иушэтыпIэ департамент ипащэу Елена Куква проектэу «Наука вокруг» зыфиIорэр кейс гъэшIэгъонэу къыгъэлъэгъуагъ. Проектхэр зэрэбгъэхьазырыщтхэр, зэнэкъокъухэм узэрахэлэжьэщтыр, анахь унаIэ зытебгъэтын фэе лъэныкъо­хэр ыкIи нахьыбэрэ хэукъоныгъэу ха­шIыхьэхэрэр къэзэрэугъоигъэхэм Еленэ къафиIотагъ.
Мы проектыр гъэрекIо зэрифэшъуашэу щыIэныгъэм щыпхыращыгъ, мыгъи Урысыем гъэсэныгъэмкIэ и Министерствэ игрант къыхьыгъ, IофшIэнми па­дзэжьыгъ. Зэхахьэм хэлэжьагъэхэр Адыгеим илIыкIо ашIогъэшIэгъонэу къе­дэIугъэх, зыгъэгумэкIырэ упчIэхэр ратыгъэх.
Шъугу къэдгъэкIыжьын, Адыгэ къэралыгъо университетым ипроектэу «Наука вокруг» зыфиIорэр федеральнэ проектэу «Популяризация науки и технологий» зыфиIорэм къыдыхэлъы­тагъ, гъэрекIо Урысыем гъэсэныгъэмкIэ и Министерствэ игрант къыхьыгъ. Мэкъу­огъум къыщегъэжьагъэу тыгъэгъазэм нэс щыIэныгъэм щыпхыращыгъ. Урысые кIэлэцIыкIу гупчэу «Орленкэм» шIэныгъэм ифестивальхэр щырагъэкIокIыгъэх. КIэлэеджакIохэм естественнэ шIэныгъэ­хэм ыкIи хьисапым япхыгъэу онлайн егъэджэнхэр афызэхащагъэх. Ахэм зэкIэмкIи нэбгырэ 270-рэ фэдиз ахэлэжьагъ, интернеткIэ нэбгырэ мини 4-м ехъу яплъыгъ. «Орленкэм» щызэхащэгъэ фестивальхэм нэбгырэ мин 16-м ехъу хэлэжьагъ, нэмыкI Iофыгъуаби зэшIуа­хыгъ. Мы илъэсыми проектым епхыгъэ Iофтхьабзэхэр аублагъэх. Урысые кIэлэцIыкIу гупчэу «Смена» зыфиIорэм шIэныгъэм ифестиваль щызэхащагъ. НыбжьыкIэхэм я Мафэ ехъулIэу шIэныгъэм фэгъэхьыгъэу ныбжьыкIэхэм гущыIэгъу афэхъугъэх.
Адыгэ къэралыгъо университетым ипресс-къулыкъу.