«НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэ зэнэкъокъоу Краснодар краим щызэхащагъэм Шъачэ щыщ кIэлэегъаджэу Нэфсэт Платовар щытекIуагъ, тамыгъэу «КIэлэегъэджэ Олимп» зыфиIорэр къыфагъэшъошагъ.

Хабзэ зэрэхъугъэу, гъэсэныгъэм хэ­хъоныгъэ егъэшIыгъэнымкIэ Краснодар дэт институтыр ары зэнэкъокъум изэфэшIыжьын ыкIи анахь дэгъухэм якъыхэгъэщын афэгъэхьыгъэ мэфэкI зэхахьэр зыщыкIуагъэр. Краим иадминистрацие, профсоюзхэм яхэушъхьафыкIыгъэ шIухьафтынхэр ыкIи пансионатэу «Нэф­шъагъу» зыфиIорэм зэрэкIощт путевкэр 2025-рэ илъэсым ныдэлъфыбзэмрэ литературэмрэкIэ кIэлэегъэджэ анахь дэгъоу къыхагъэщыгъэ Нэфсэт Сэфэрбый ыпхъум къыратыгъэх. Зэнэкъокъум зэрэхэлэжьагъэмкIэ Диплом къыфагъэшъошагъ ТIопсэ районым ит къуаджэу Псыбэ дэт гурыт еджапIэу N 17-м адыгабзэмрэ адыгэ литературэмрэкIэ икIэ­лэегъаджэу Шъхьэлэхъо Заремэ. Шъугу къэдгъэкIыжьын, блэкIыгъэ илъэсым тыжьыныр мыщ фэдэ зэнэкъокъум къы­щыдихыгъагъ къуаджэу Хьаджыкъо дэт еджапIэу N 94-м ныдэлъфыбзэр щязыгъэхьырэ Нэпсэу Русетэ.
– НыдэлъфыбзэмкIэ анахь кIэлэегъэджэ дэ­гъур Шъачэ щэлажьэ! — къыхагъэщыгъ Краснодар краимкIэ гъэсэны­гъэм иIофышIэхэм япрофсоюз. — Творческэ зэнэкъокъоу ныдэлъфыбзэмрэ литературэмрэ еджапIэм щягъэхьыгъэным екIолIакIэу кIэлэ­егъаджэмэ фыряIэр къы­хэгъэщыгъэным фытегъэпсыхьагъэр ящэнэрэу рагъэкIокIыгъ. Мыгъэ ащ хэлэжьэнхэу шъолъырым имуниципалитет 15-мэ якIэлэегъа­джэхэм зарагъэтхы­гъагъ, ахэм ащыщыгъэх кIэлэегъаджэхэу урысыбзэр, адыгабзэр, къэ­бэртэе-черкесыбзэр ыкIи ассириябзэр языгъэ­хьыхэрэр.
— Апэрэ едзыгъом кIэлэегъа­джэхэр лъэныкъохэу «Методическэ мастерскоир» ыкIи «Урокыр» зыфиIохэрэмкIэ зэрагъэнэкъокъугъэх, — къыщыкIагъэтхъыгъ Профсоюзым. — КIэлэегъэджэ IофшIэным епхыгъэ гупшысакIэр, зэфэхьысыжьхэр шIыгъэнхэр, ныдэлъфыбзэм ыкIи ныдэлъф литературэм фегъэджэгъэнхэмкIэ Iофыгъуа­кIэхэр къагъэлъэгъонхэ фэягъ. Кiэлэегъаджэхэм IофшIэнымкIэ къаушыхьатыгъ кIэлэеджа­кIохэр егъэджэгъэнхэмкIэ яIэпэIэсэныгъэ зынэсырэр.
Зэнэкъокъум къыхиубытэрэ лъэныкъо­хэр зэкIэ зызэфахьысыжьхэм, текIоныгъэр къыдэзыхыгъэу зыцIэ къыраIуа­гъэр къалэу Шъачэ щыщ Платова Нэфсэт Сэфэрбый ыпхъур ары. Урысыбзэмрэ литературэмрэкIэ кIэлэегъэджэ анахь дэгъоу 2025-рэ илъэсым къыхахы­гъэр поселкэу Якорная Щель щэпсэу. Ар Шъхьэ­лахъохэм ащыщ, Шъачэ къэралыгъо университетым филологиемкIэ ифакультет къыухыгъ. Илъэс заулэхэм поселкэхэу Верхняя Беранда ыкIи Шэхапэ ащыригъэджагъ. КIэлэегъаджэу зылажьэрэр илъэс 15 хъугъэ.

— ЕджапIэм сыщылажьэзэ нафэ къысфэхъу сиIофшIэн шIуагъэу къыкIакIорэр, ащ мэхьанэшхо иI, — къеIуатэ Нэфсэт. — СишIэныгъэхэр кIэлэеджакIохэм анэзгъэсынымкIэ, ахэм янеущрэ мафэ зыфэдэщтымкIэ пшъэдэкIыжь зэрэсхьырэр икъоу зэхэсэшIэ.
Сэнаущыгъэ ыкIи гуетыныгъэ зиIэ кIэлэцIыкIухэр инасып къызэрихьыхэрэр кIэлэегъаджэм къыхегъэщы: ригъа­джэ­хэрэм апэрэ чIыпIэхэр творческэ зэ­нэкъокъухэм къащахьы, конференциехэм, урысыбзэмкIэ ыкIи литературэмкIэ олимпиадэхэм ахэлажьэх. 2017-рэ илъэ­сым Нэфсэт зипэщэгъэ еджэпIэ командэу поселкэу Верхняя Беранда щыщхэр корреспондент ныбжьыкIэхэм язэнэкъо­къоу «Къамзый псаур» зыфиIоу поселкэу Тыгъэмыпс кIэлэцIыкIу творчествэмкIэ Гупчэу дэтым зэхищагъэм анахь дэгъоу къыщыхахыгъ. 2020-рэ илъэсым ащ ыгъэсэгъэ Хъущт Ринат кIэлэеджа­кIохэм яинтерактивнэ IофшIагъэхэр къызщагъэлъэгъогъэ зэIухыгъэ зэнэкъо­къоу «Ветеранхэм ыкIи Хэгъэгур къэзыухъумэхэрэм ятарихъ шIэжь къэтыухъумэн» зыфиIорэм щытекIуагъ.
– Ащ иIофшIагъэ тичIыгогъухэу Советскэ Союзым и ЛIыхъужъ хъугъэхэм, илIакъо щыщхэу Хэгъэгу зэошхом илъэхъан фашист техакIомэ язэуагъэхэм афэгъэ­хьыгъагъ, — къыкIигъэтхъыгъ кIэлэегъаджэм. — КIэлэеджэкIо цIыкIоу Дарья Рязанцевам рассказ гъэшIэгъонхэр етхых, ахэр джырэблагъэ литературнэ журналэу «Одыджынышху» зыцIэм къыщыхаутыщтых. Джащ фэдэу гур къэзыIэтырэмэ апае сэ Iоф сэшIэ. Урысыбзэмрэ литературэмрэ зэрафезгъэ­джэхэрэ закъор арэп, ахэм ясэнаущыгъэ къызэIуахыным, ятворчествэ лъагъэкIотэным, гукъыдэчъыкIэхэр ашIынхэм сиIахьышIу зэрэхэслъхьашъурэр ары сызгъэгушIорэр.
ЕджапIэм Iоф зыщишIэрэ уахътэм Нэфсэт Сэфэрбый ыпхъур тIогъогогъо сэнэхьат зэнэкъокъухэм ахэлэжьагъ. 2022-рэ илъэсым ар класснэ пащэхэм якъэлэ зэнэкъокъу гъэунэфыгъэ чIыпIэ къыщыдихыгъагъ, мыгъэ шъолъырымкIэ апэрэ хъугъэ. Джы Урысые зэнэкъо­къоу «Ныдэлъфыбзэм ыкIи литературэм якIэ­лэегъэджэ анахь дэгъур» зыфиIорэм Краснодар краир къыщигъэлъэгъощт, ар Республикэу Бурятием икъэлэ шъхьаIэу Улан-Удэ Iоныгъо мазэм щыкIощт. Уигу­хэлъхэр Тхьэм къыбдегъэхъух, Нэфсэт!
Ныбэ Анзор.