ЗыкI къэралыгъо ушэтынхэр дэгъу дэдэу зытыгъэхэм джыри зы нэбгырэ къахэхъуагъ. Ар — Мыекъопэ лицееу N 19-р къэзыухыгъэ ЛIыIужъу Айтэч. ЗыкI къэралыгъо ушэтыным хьисапымкIэ пчъагъэу 100-р ригъэкъугъ. НэмыкIэу ытыгъэхэмкIи кIалэм шIэныгъэ дэгъухэр къыгъэлъэгъуагъэх — урысыбзэмкIэ пчъагъэр 94-рэ, информатикэмкIэ — 93-рэ.

Айтэч зэрахэтэу зэкIэмкIи Адыгеим 100 къыщызыхьыгъэхэм япчъагъэ нэбгыри 9 мэхъу, ушэтынхэмкIэ къэгъэлъэгъон анахь дэгъур — 10. Шъугу къэдгъэкIыжьын, я 34-рэ лицееу Мыекъуапэ дэтыр къэзыухыгъэ Александр Мусиным пчъагъэу 100-р предметитIукIэ — урысыбзэмрэ физикэмрэкIэ — къы­хьыгъ. Джащ фэдэу анахь дэгъух: я 34-рэ лицеим къычIэкIыгъэ Анастасия Гужовар (химиемкIэ), Яблоновскэм ия 5-рэ еджапIэ къэзыухыгъэ Аскар Шафиковыр (химиемкIэ), Инэм ия 25-рэ еджапIэ щеджэгъэ Татьяна Лысенкэр (урысыбзэмкIэ), Мые­къопэ гурыт еджапIэу N 2-м къычIэкIыгъэ Полина Пранкевич (литературэмкIэ), Адыгэ республикэ гимназиер къэзыухыгъэ ХьакIмэфэ Мэдин (физикэмкIэ), Мыекъопэ гурыт еджапIэу N 7-р къэзыухыгъэ Роман Сафроновыр (географиемкIэ), Мыекъопэ лицееу N 19-м щеджэгъэ Яна Исущевар (урысыбзэмкIэ).
«ТхьамэфитIукIэ узэкIэIэбэжьмэ, ныбжьыкIэхэм гущыIэгъу сащыфэхъугъагъ къычIэтIупщыгъом фэгъэ­хьыгъэ мэфэкIым, ау шышъхьэIу мазэм джыри зэ заIузгъэкIэщт ягъэхъагъэхэм апае зэрифэшъуашэу сафэгушIонэу.
Къыхэсымыгъэщын слъэкIыщтэп кIэух дэгъу джащ фэдэу еджэкIо нэбгыри 100 фэдизмэ къызэрагъэлъэгъуагъэр ушэтынхэу предмет зэфэшъхьафхэмкIэ пчъагъэу 90-рэ ыкIи ащ нахьыбэ къахьи.
Джыри зэ сафэгушIо еджапIэр къэзыухы­гъэхэм! ЩыIэныгъэм лъэбэкъукIэу щадзырэм пытагъэ къызщыхагъэфэнэу, гъэхъэгъа­кIэу щашIыхэрэм гушIуагъо къафихьынэу, те­кIо­ныгъакIэхэр къыдахынхэу ыкIи лъэны­къуакIэхэр къыщызэIуахынхэу сафэлъаIо!
Шъхьафэу рэзэныгъэ гущыIэхэр зыфэ­гъэхьыгъэхэр кIэлэегъаджэхэу ыкIи ны-ты­хэу зиушъыйхэмрэ зиIэпыIэгъурэ ныбжьыкIэхэр ащ фэдэ гъэхъагъэхэр ашIынхэм къы­фэзыщагъэхэр арых», — къащитхыгъ АР-м и ЛIышъхьэ исоциальнэ нэкIубгъохэм.