Мыекъопэ футбол клубэу «Зэкъошныгъэм» тамыгъакIэу иIэщтым икъыхэхын къыхэлэжьэн­хэу ащ зафегъазэ мы спорт лъэпкъыр зикIасэхэм, тикомандэ лъыплъэхэрэм.

Командэм ипресс-къулыкъу къыхихыгъ клубым тамыгъэу иIэ-мэ хъунэу ылъытэрэр ыкIи студиеу «Мультоград» зыфиIорэр игъусэу ащ иэскиз ыгъэхьазы­рыгъ, лъэтегъэуцуи фишIыгъ. «Зэкъошныгъэр» зикIэсабэмэ ар агу рихьыгъэу къыхагъэщыгъ. Анахь къадэхъугъэу алъытэрэр футбол клубым шъоу ыгъэфедэхэрэр — гъожь-уцышъо зэхэлъыр тамыгъэ­ми зэрэщыгъэфедагъэр ары. ЫцIи къыхахыгъ — домбаишхом Зубер фаусыгъ. Тамыгъэр зылъэгъугъэ­хэм ащыщхэм къыхагъэщы домбаир нахь нэгушIоу, узыфищэу, бэрэчэтэу шIыгъэмэ нахьышIоу. Арышъ, домбаеу Зубер итеплъэ нахь узыфищэу зэрашIын алъэкIыщтымкIэ еплъыкIэхэм ащагъэ­гъозэнхэу «Зэкъошныгъэм» зыгу фэщагъэхэм футбол клубым зафегъазэ. Бгъу пстэумкIи: ынэгукIи, ыцIэкIи, ар зэрэщытымкIи, пылъ пкъыгъохэмкIи зэхъокIыныгъэу фэшIыгъэмэ хъунэу алъытэхэрэм ахэплъэщтых. КIэлэцIыкIухэм ар агу ыхьыным пае зэрэшIыгъэмэ нахьышIуми егупшысэщтых. Джащ фэдэу Зубер футболым епхыгъэу зэрэщытыр къыгъэнафэу клубым ыгъэфедэрэ шъохэр зыхэлъ пэIо цIыкIу е пшъэдэлъ ищыгъын хэгъэхъогъэныри ищыкIэгъэнкIи хъун.
Футбол клубым ипресс-къулыкъу къызэритырэмкIэ, хэти иеплъыкIэ зыщагъэгъозэщт, ахэр къы­далъытэхэзэ, тамы­гъэу клубым иIэщтым Iоф дашIэщт. «Зэ­къошныгъэм» ицыхьэ телъ арэущтэу Iоф зэдашIэмэ, тифутбол командэ итамыгъэ гум ыхьэу, узыфищэу зэрэхъущтым. Зубер футбол клубымрэ ащ цыхьэ фэзышIыхэу, игъэхъагъэхэм агъэгушIохэрэмрэ языпхыныгъэ итамыгъэу щытыщт.
Охътэ благъэхэм клубыр онлайн шIыкIэм тетэу цIыфхэм яшIошIхэмкIэ яупчIыщт, ащ икIэух­хэр иофициальнэ сайт ыкIи исоциальнэ нэкIубгъохэм къарагъэ­хьащтых.