Адыгеим и ЛIышъхьэу КъумпIыл Муратрэ Уры­сые Федерацием мэкъу-мэщымкIэ иминистрэу Оксана Лутрэ Москва IофшIэгъу зэIукIэгъу щызэдыряIагъ. Республикэм имэкъумэщ къыдэгъэкIыжьын зыкъегъэIэтыгъэнымкIэ, чIыгулэжьхэм IэпыIэгъу ятыгъэнымкIэ, къуаджэ­хэм хэхъоныгъэ ашIыным­кIэ, республикэм исоци­альнэ-экономикэ хэхъоныгъэ епхыгъэ унэе программэхэр пхырыщы­гъэнхэмкIэ зэшIохыгъэн фэе Iофыгъохэм ахэр атегущыIагъэх.

Оксана Лут республикэм ынаIэ къызэрэтыригъэтырэм пае зэрэфэразэр КъумпIыл Мурат къыIуагъ, федеральнэ къулыкъум иIэпыIэгъу ишIуагъэкIэ рес­публикэм имэкъумэщ къыдэгъэкIыжьын хэхъоныгъэ зэришIырэр, къоджэдэсхэм джырэ уахътэм диштэрэ щыIэкIэ Iэрыфэгъу яIэнымкIэ ящыкIагъэхэр зэрарагъэ­гъотыхэрэр къыхигъэщыгъ.
«Мэкъумэщ къыдэгъэкIыжьыным ихэ­хъоныгъэ лъэшэу тынаIэ тетэгъэты. Илъэс къэс ащ хэхъоныгъэ зэришIырэр нэрылъэгъу. Урысыем и Президентэу Владимир Путиным мэкъу-мэщым къыщахьыжьырэр нахьыбэ шIыгъэным, хэгъэгур зэрэпсаоу гъомылапхъэмкIэ щынэгъончъэным епхыгъэ пшъэрылъэу къыгъэуцугъэхэр зэкIэлъыкIоу респуб­ликэм щызэшIуахых. Былымхъуным хэхъоныгъэ егъэшIыгъэнымкIэ, Адыгеир зэрыгушхохэрэм зыкIэ ащыщ адыгэ къуаеу къыдагъэкIырэр тапэкIи нахьыбэ зэрашIыщтымкIэ Iофыгъохэр зэшIохыгъэ хъунхэм пае лъэныкъуабэ къыдэтэлъытэ. Цумпэ лъэпкъ зэфэшъхьафхэр къэзыгъэ­кIырэ хъызмэтшIапIэхэм япчъагъи нахьыбэ хъугъэ. Грант зэнэкъокъоу «Аг­ростартап» зыфиIорэм а лъэныкъом­кIэ ишIуагъэ къэкIо, Адыгэ Республикэм исоциальнэ-экономикэ хэхъоныгъэкIэ унэе программакIэм къыдыхэлъытагъэу нэмыкI IэпыIэгъу зэфэшъхьафхэми амалышIухэр къатых. Мэкъу-мэщым нахьыбэу предпринимательхэр хэтщэнхэм тынаIэ тетэгъэты. Урысые Федерацием мэкъу-мэщымкIэ и Министерствэ IэпыIэгъоу къытитырэм ишIуагъэкIэ бэ дгъэцэкIэн тлъэкIырэр», — къыхигъэщыгъ КъумпIыл Мурат.
Мы Iофыгъоу зытегущыIэхэрэм къадыхэлъытагъэу АР-м и ЛIышъхьэ къыхигъэщыгъ чIыгулэжьхэм фэгъэкIотэныгъэ зыхэлъ чIыфэхэр аIэкIэгъэхьэгъэнхэми шIуагъэ къызэритырэр. Мы илъэсым сомэ миллион 86,1-рэ а лъэныкъом­кIэ субсидиеу республикэм щагъэнэ­фагъ, чIыфэ сомэ миллиардым ехъурэмкIи зэзэгъыныгъэхэр зэдашIыгъэх.
Адыгеим и ЛIышъхьэ технологиякIэхэм ягъэфедэн зэрэкIорэми игугъу къы­шIыгъ. ГущыIэм пае, чылэпхъэшIухэм якъыхэ­хынкIэ технологическэ лъапсэу хъурэр агробиотехнопарк инэу «Джаджэр» ары. Ащ нэмыкIэу мэкъумэщ къыдэгъэкIыжьынымкIэ инвестиционнэ проект заулэ республикэм гъэцэкIагъэ щэхъу: дагъэм­рэ пынджымрэ якъыдэгъэкIынкIэ заводыкIэхэм ягъэпсын лъэкIуатэ. Къоджэ­дэсхэмрэ къэлэдэсхэмрэ ящыIакIэ зэфэдэ шIыгъэным пае бэ зэшIуахырэр. Къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм ащкIэ ишIуагъэ къэкIо. А программэм къыдыхэлъытагъэу илъэси 5-м къыкIоцI гъэсэныгъэм, псауныгъэм икъэухъумэн, культурэм, спортым, гъогу ыкIи инженер инфраструктурэм алъэныкъокIэ псэолъи 178-рэ агъэцэкIэжьыгъ.
IофшIэгъу зэIукIэгъум илъэхъан хэушъхьафыкIыгъэу анаIэ зытырадзагъэхэм ащыщыгъ Адыгеим ипсэупIэхэм хэхъоныгъэ ашIынымкIэ пIэлъэ кIыхьэм телъы­тэгъэ гухэлъхэм япхырыщын. Къэралыгъо IэпыIэгъум зегъэушъомбгъугъэным, къуаджэхэм яинфраструктурэ хэхъоныгъэ егъэшIыгъэным, Iофтхьабзэу рахъу­хьагъэхэр зэшIохыгъэнхэм пае бюджетым къыхимыубытэрэ къэкIуапIэхэр гъэфедэгъэнхэм япхыгъэ IофыгъохэмкIэ пшъэрылъхэр агъэнэфагъэх.

АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.