Хэгъэгу зэошхом ТекIоныгъэр къызщыдахыгъэр илъэс 80 зэрэхъугъэм епхыгъэу къалэу Волгоград щыкIогъэ Урысые Спартакиадэу дзэм къулыкъу щахьыныр зыпэкIэ къэтхэр зыхэлэжьагъэхэр ыкIэм фэкIуагъ.

Адыгэ Республикэм ыцIэкIэ ахэм ахэлэжьагъ Джэджэ районым щыщ ныбжьыкIэ нэбгыри 10. ЗэкIэмкIи Спартакиадэм Урысыем ишъолъырхэм къарыкIыгъэ спортсмен 500-м ехъу ыугъоигъ. Илъэс 14 — 17 зыныбжь ныбжьыкIэхэр командэ 43-рэ хъущтыгъэх.
Зэнэкокъухэм япрограммэ къызэрэдыхэ­лъытагъэу, спорт­сменхэм къагъэлъэ­гъуагъ физическэ ухьазырыныгъэу яIэр, дзэ къулыкъум нахь епхыгъэ IэпэIэсэныгъэу аIэкIэ­лъыр. Ахэр къэпкIагъэх, гранатыр адзыгъ, къызэпэчъагъэх.
Культурнэ программэ шъхьафи спорт­сменхэм афагъэхьазырыгъ. Ахэр ащагъэх «Сталинград заом и ЛIыхъужъхэр» зыфаIорэ мемориальнэ комплексэу Мамаев Iуашъ­хьэм щыгъэпсыгъэм.
Спартакиадэр зэхащагъ Урысые Федерацием спортымкIэ, зыкъэу­хъумэжьынымкIэ иминистерствэ­хэм ыкIи физическэ культурэмкIэ, спортымкIэ Волгоград хэкум и Комитет. Iофтхьабзэм пшъэрылъ шъхьаIэу иIагъэр ныбжьыкIэхэр патриотхэу къэтэ­джынхэм фэщэгъэнхэр, яфизическэ ухьазырыныгъэ хэгъэхъогъэныр, Хэгъэгум иухъу­макIохэу зэрэщытхэр къагурыIоу псэ­унхр ары.