Урысые проектэу «Больше, чем путешествие» зыфиIорэм ипрограммэ хэхьэгъэ Адыгэ къэралыгъо университетым «Тридцатка с математикой» зыфиIорэ гъэкIэкIыгъэ егъэджэнхэр мы мафэхэм щыIагъэх.

Ящэнэрэ шIэныгъэ-зекIо егъэджэнхэр Адыгеим икъушъхьэхэм ащыкIуагъэх. Тишъолъыр имызакъоу, Краснодар краим, Томскэ, Казань, Ростов-на-Дону, Санкт-Петербург, Москва ыкIи Сириусым къарыкIыгъэ нэбгырэ 41-рэ ащ хэлэ­жьагъ.
Хьисапым епхыгъэ сэнэхьат зэзыгъэ­гъотырэ студентхэмрэ Адыгэ къэралыгъо университетым, университетэу «Сири­усым», Москва дэт физикэ-техническэ институтым, Санкт-Петербург и Лъэпкъ ушэтын университет, Томскэ политехническэ университетым якIэлэегъаджэхэмрэ Iофтхьабзэм хэлэжьагъэх.
Адыгэ къэралыгъо университетым и Кавказ хьисап гупчэ ыкIи университетэу «Сириус» зыфиIорэр ары мыщ икIэщакIохэр. Мыгъэ ар ящэнэрэу зэхащэ.
Iофтхьабзэм къыдыхэлъытагъэу мэфищым къыкIоцI хьисапымкIэ яшIэныгъэхэм Адыгеим щахагъэхъуагъ. Нэужым къушъхьэр зэпачынышъ, хым кIощтых. Лекциехэм анэмыкIэу мэфитIум «Сириусым» хьисапым епхыгъэу зэдэгущыIэгъухэр щызэхащэщтых.
Проектым инаучнэ пащэр хьисап шIэныгъэм хэхъоныгъэ ышIыным зиIа­хьышIу хэлъэу, Адыгэ къэралыгъо университетым, Москва ифизикэ-техническэ институт япрофессорэу, шIэныгъэхэмкIэ Урысые академием хэтэу Алексей Савватеевыр ары.
Iофтхьабзэм къыдыхэлъытагъэу шIэныгъэлэжьхэм хьисапымкIэ лекциехэр зэхащагъэх. Студентхэм шIэныгъакIэхэр агъотыгъэх, ахэм ащыщ хьисапыр спортым, транспортым, инженерием зэращыбгъэфедэн плъэкIыщтыр, IэрышI интеллектым епхыгъэуи яшIэныгъэхэм ахагъэ­хъуагъ. Iофтхьабзэм ишIуагъэкIэ студентхэм яшIэныгъэхэм зэрахагъэ­хъуагъэм имызакъоу, ушэтын зэфэ­шъхьафхэр зэ­рэп­шIыщт­хэри зэрагъэ­шIагъ, япсауныгъэ агъэпытэн амали яIагъ.
Джы хьисапым имызакъоу, нэмыкI лъэныкъохэм япхыгъэуи мыщ фэдэ Iоф­тхьабзэхэр зэхащэнхэу агъэнафэ.

Адыгэ къэралыгъо университетым ипресс-къулыкъу.